Shillong, Naitung 26
Kawei ka nongshong shnong na East Garo Hills bad phra ngut kiwei pat ki la ai ïa ka jingujor pyrshah ïa arngut ki briew ïa kiba la tip kyrteng kum u Arun Lama Sangma bad ka Bernadeth T Sangma da kaba kynnoh ba ki la pynngop ïa ki ban bei tyngka ha kawei ka ‘App’ ba la tip kum ka ‘Datameer AI’.
Ha ka khubor ba la ïohlum lyngba ka ‘Website’ jong ki pulit ha ka Sngi Thohdieng, la ong ba ha katei ka ‘App’, la pyndonkam da ka dur jong u CEO ka Aditya Birla Sun Life AMC Limited ban pyni ba u dei u nongïalam jong ki.
Nalorkata, kitei kiba la ujor ki la ong ba u Arun bad ka Bernadeth ki la kular ïa ki ba kin ïohnong shibun lada ki bei tyngka. Hynrei, hadien katto-katne por, kitei ki nongujor ki la sngewthuh ba ki la shah thok bad ka pisa ka la kot sha ka T. 3,98,300. Shuh shuh ki pulit ki la ong ba kawei ka nongshong shnong na North Garo Hills ka la ujor pyrshah ïa uwei u briew ba la tip kum u Aron Sangma bad ka kurim jong u, ka B Sangma, halor ka jingkynnoh ba kine ki arngut ki la pynngop ïa ka ban bei ha kawei ka ‘App’ ba la tip kum ka ‘Datameer’ da ka jingkular ba kan ïohnong shibun. Hynrei la kynnoh ba naduh ka 23 tarik Naitung, ka pisa ka khlem poi shuh sha ka ‘Account’ jong ka.
