![Peit ïoh mih ki ‘riew shimet ba buh ‘Uniform’ ha ïing, shabar ki wan da ka banian: Ardent vpp](https://unongsainhima.com/wp-content/uploads/2024/07/vpp-2.jpg)
Jowai, Naitung 26
“Kiba kwah ban ïakhun ïa ka ilekshon na ka VPP ki dei ban sngewthuh shai ba ka seng kan ym ailad ïa u/ka MDC lane MLA ban long kontraktor lane ‘supplier’ namar ka kamram jong ki ka dei ban ai ka jingshakri ïa u paidbah ym ban ïaknieh spah bad u paidbah.”
Ïa kane la ong da u nongïalam ka Voice of the People Party (VPP), Bah Ardent Miller Basaïawmoit haba kren ha ka jingïalang ai khublei ïa u paidbah kaba la long ha Ïawmusiang, Jowai ha ka 26 tarik Naitung.
Haba bteng ïa ka jingkren, u Bah Ardent u la ong ba shuwa ba un long MLA, u dei u ‘Supplier’ hapoh MeECL kaba ki ong mynshuwa ka MSEB, hynrei mar sien ïakhun ïa ka ilekshon u la sangeh noh namar u ong ba um lah ban ïaknieh kam bad ki khun samla lane bad kiwei pat.
“Nga im tang da ka tulop MLA la nga duk ne riewspah ngam lah ban ud ngam lah ban khñium namar nga la leit sha u paidbah ban tyrwa ba ngan shakri ïa u paidbah,” la ong u Bah Ardent.
U la bynrap ba ïa kane kajuh ka jingpyrkhat, ka VPP ka kwah ban pynrung ha kito kiba kwah ban long MDC ne MLA ha ki por ki sngi ban wan khnang ban lah ban ai shisha ïa kata ka jingshakri kaba u paidbah un hun.
Shuh shuh u Bah Ardent u la ong ba u la bna ba ha Ri-lum Jaiñtia kiwei ki seng ki ong ba ka la eh ban ïakhun pyrshah bad u Prah ha kane ka ilekshon MDC, bad ki la thmu ban pynïeng kyrtong shimet khnang ban ym leit sha u paidbah kum kita ki seng kiba u paidbah um pdiang shuh bad kin leit noh kum ki ‘riew shimet.
“Hynrei kynmaw bha ïoh mih ki ‘riew shimet kiba buh ‘Uniform’ ha ïing, katba shabar ki wan da ka banian,” u la ong.