Shillong, Naitung 26
Ka ‘thei ïalehkai ka ri, ka Renuka Singh Thakur ka la ong ba ka India ka la lah ban ïalehkai bha ha ka Women’s Asia Cup bad ka la khmih lynti ban bteng ïa kajuh ka rukom ïalehkai ha ka phainal na ka bynta ban rah biang ïa ka khusnam kum ka lahduh ha ka sngi U Blei.
Ha ka jingïakhun semi final ba nyngkong kaba la long ha ka sngi Thohdieng, ka India ka la lah ban pynliem ïa ka Bangladesh da 10 wiket, bad ka Renuka kaba la khur ïa ka nam Player of the Match, ka la noh synñiang na ka bynta ban khur ïa ka jingjop lyngba ka jingïalehkai kaba itynnad bha.
“Ngi kwah tang ban ïalehkai bha, kaba ïaid beit kumba ngi la ju leh ha kane ka lympung haduh mynta. Kyrmen ba ngin lah ban rah ïa ka Asia Cup,” la pynpaw ka Renuka hadien ba la kut ka jingïalehkai.
Te kumta ka India kan ïaknieh ïa ka nam lahduh pyrshah ïa ka kynhun ka ban khur ïa ka jingjop ha ka semifinal kaba ar hapdeng ka Pakistan bad ka Sri Lanka.
“Kam pher mano mano na ngi ki ban ïalehkai ha ka phainal. Ngi donkam tang ban pynleit jingmut ha ka jingkhlaiñ jong ka kynhun jong ngi. Ka jingthmu jong ngi ka long ban khur biang ïa ka nam lahduh ha kane ka kynti kaba mynta”, ka la bynrap.
Ha kane ka jingïakhun jong ka ha ki lai wiket, ka Renuka ka la pyndep ruh haduh 50 wiket ha ka T20I. “Nga sngewkmen shibun ban khur ïa ka wiket kaba 50 ha ka T20I. Hynrei kaba kham kongsan ka long ba nga la lah ban noh synñiang sha ka jingjop na ka bynta ka kynhun bad ka ri.”
Kane ka ‘thei ïalehkai ba 28 snem ka rta ka la ïathuh ba ma ka bad ka paralok ïalehkai ka Pooja Vastrakar ki la kut jingmut ban ïalehkai bha ha kane ka lympung.
“Nga don ka jingïatreilang kaba bha bad ka Pooja (ha ka jingkawang bol). Ki buit bad ka jingmut jingpyrkhat jong ngi ki long kiba suk bha. Nga ïalehkai ha ka ban kawang bol khnang ban khur wiket.,” ka la bynrap.
