Shillong, Naitung 26
Hadien ba ki dkhot jong ka Hynñiewtrep Youth Front (HNYF) ki la shah rah noh ha ki bor pulit na ka jingkieng ha Umtyngar namar ka jingbat jong ka seng ïa ki kali kamai Tourist ha ka step jong ka 26 tarik u bnai Naitung 2024 sha thanat Sadar, na ka liang u President rangbah ka seng, u Bah Sadon Blah u la leit mardor shapoh thanat Sadar ban tuklar lem halor kane ka jingshah kem ki dkhot.
Kum ban shu kdew, ka HNYF ka la leit ban hiar dalade sha ka jingkieng Umtyngar ban bat bad pynphai ïa baroh ki kali kamai Tourist kiba wan nabar ka jylla kum ka dak ban pyni sha ka sorkar halor ka jingsngap mynthi ban pyntreikam noh ïa ka Meghalaya Residents Safety and Security Act (MRSSA) bad ban wanrah ïa ki rukom treikam jong ki kam jngoh kai pyrthei khnang ba ki kali kamai Tourist kiba wan nabar ka jylla kin nym ïoh satia ka lad ban kamai sahuh hapoh kane ka jylla.
Ïa ki dkhot ka seng la rah noh da ki bor pulit na ka jingkieng ha Umtyngar bad la pynkit ïa ki sha Civil Hospital Shillong ban leh ïa ka Medical Check-up bad hadien kane la rah ïa ki sha thanat Sadar ban pynlong ka jingtohkit. Hadien ba u Bah Sadon u la wan poi ha thanat, na ka liang ki bor pulit kiba don hakhmat ka khyrdop jong ka thanat ki khlem shah satia ba un rung sha thanat.
Ki nongïalam bad dkhot ka seng kiba la shah rah sha thanat Sadar ki kynthup ïa u Steve Raymond Khyriem, President EKH, Bah Orester Mawlong, Disciplinary Secretary, Bah Andrew Lyngdoh, Secretary, Bah Banrap Wanniang, Vice President, Bah Frankie Lyngdoh, Office Secretary, Bah Melvin kum u dkhot, Bah Tyllibor Swer, Education ha ryngkat kiwei kiwei.
