Guwahati, Naitung:
Ki pulit ki la pynlong da ka jingleit khynra hadien ba ki la ïoh jingtip ba ka la don ka jingdie ïa iwei khyllung ha Darrang distrik, Assam. Kane ka jingjia ka la jia haba ki pulit bad ki bor ba dei khmih ki la ïoh ban pyllait im ïa iwei khyllung ba la shah die ha ka dor T 35,000.
U Nayan Jyoti Dev Kashyap, uba long u nongshong shnong jong ka Kalaigaon, u la shahkem halor ka jingshah pynshisha ba u la die ïa iwei i khun jong kawei ka briew kaba u ju ïajuh-ïajan khlem ka jingtip jong ka. U Kashyap dang shen u la leit sha Gerimari, Mangaldoi, hadien ba u la ïakynduh ïa kane ka briew bad saw ngut ki khun jong ka ha ka Social Media.
Ka Darrang District Child Protection Department ka la ai jingtip sha ka kynhun ba dei ban khmih halor ki aiñ hadien ba ki la ïoh jingtip halor ka jingjia. Ki pulit khlem da pynslem ki la pynïaid shakhmat ïa ka jingpyntreikam bad ïoh ban kem ïa u Kashyap, ha ryngkat uwei u heh spah bad u nongthied ïa ine i khyllung ha Bongaigaon Salmar.
Baroh kine kiba la shah kynnoh ki la shah ïalam hakhmat ka ïingbishar ha Mangaldoi bad ki la shah set patok na ka bynta ban pynlong ïa ka jingtohkit. Ka jingtohkit ha kaba ïadei bad ka jingjia ka dang ïaid shakhmat khnang ban tip bniah ïoh ba dang don shuh shuh kiwei pat ki khyllung-khynnah kiba shah die ne ban tip ïohba don ka kynhun ba ju die briew.
