Nongpoh, Naitung 26
U MLA jong ka Nongpoh konstitwensi, u Bah Mayralborn Syiem ha sngi Thohdieng u la leit pynkup burom kyrpang ïa ki ‘thei ïalehkai phutbol U-17 jong ka Christian Higher Secondary School, Pahamsyiem shwa ba kin mih noh na ka Jylla ban leit sha ka nongbah Delhi ban ïashim bynta ha ka 63rd International Subroto Cup Football Tournament 2024.
Ha kane ka sngi, kaba dei ruh ka jingïalang kaba la pynlong kyrpang da ki bor pynïaid skul ka Christian Higher Secondary School ban kitbok kitrwiang bad ai burom kyrpang ïa ki ‘thei ïalehkai, la wan ban ïadon ryngkat ruh da u Bah Balajied Rani, MDC ka Nongpoh, ki nongïalam shnong jong ka Pahamsyiem, nalor kitei ki ‘thei ïalehkai bad nonghikai jong ka Christian Higher Secondary School, Pahamsyiem.
U Bah Mayralborn ha kane ka sngi kum shi bynta ban ai mynsiem ïa kitei ki ‘thei ïalehkai ka Christian Higher Secondary School, u la aiti ruh ïa ka song pisa kaba T. 1 lak ryngkat ki jingkyrkhu kyrdoh bad kitbok kitrwiang ba kin lah ban poi sha ka thong jong ka jingjop. Ha kane ka juh hi ka sngi, utei u MLA u aiti ruh ïa ka work order kaba T. 3 lak na ka bynta ban pynheh shuh shuh ïa ka ïing skul.
Na ka liang u Bah Syiem ula pynpaw ïa ka jingsngewsarong kum u nongmihkhmat ka thaiñ bad ai ruh ka jingkitbok kitwriang ïa kitei ki ar tylli kiwei pat ki skul ka Ri Bhoi ba kin poi sha ka thong bad kular ruh ba un ïakren bad ki bor ba dei khmih ka tnat ïalehkai ha ka Jylla ba kin shim khia ban pynbiang ïa ka jaka sah, ka bam ka dih jong kitei ki ‘thei bad ki ‘rang ïalehkai jong baroh lai tylli ki skul.
Kum ban shu pynkynmaw biang, ha kane ka kynti kaba mynta, ki lai tylli ki skul kiba la ïoh khur ïa ka nam lahduh ha ka State Level Subroto Cup 2024 ki dei na Ri Bhoi bad ïoh ban mihkhmat ïa ka Jylla sha katei ka lympung. Nalor ka Christian Higher Secondary School, ki ar tylli kiwei pat ki kynthup ïa ka Mynken Christian Higher Secondary School ha ka kyrdan U-17 jong ki shynrang bad ka Nongjri Presbyterian Secondary School, Nongjri ha ka kyrdan U-15 jong ki shynrang.
