![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Haba peit ïa ka jinglong jingman ha kane ka jylla jong ngi, ngi shem ba ka don kata ka jingmut kaba skhem kaba ong: “Ym i don jingkyrmen ban kiew arted, ym i don jingsheptieng ban hiar arsut”. Ha ka jingshisha, ha ka jinglong briew, ka jingkiew arted ka dei kaba hakhmat duh, bad ka ju don ka jingsheptieng lada hiar arsut. Ka jinglong jong ki Ri bad ki sorkar ruh ka long kumta. Baroh kiba kwah ban long briew man briew ha ka jingim, ban kamai jakpoh ha ka rukom kaba dei, ban don la ka jong ka ïing ka sem, ban ïoh phah pule ïa ki khun ki kti khnang ba ka kam ka jam kan bha kan miat hadien habud, bad ba ki khun ki kti kin ym mad ïa ki jingeh kiba ki kmie ki kpa ki la mad ha ka por ka jong ki, bad ban ai ïa u synñiang uba bha tam sha ka imlang-sahlang. Kita ki dei ki jingangnud bakongsan jong ki briew kiba beit ha ka pyrkhat ka pyrdaiñ bad kiba buh ïa ka jingbha, jingtrei shitom, bad ka jingkyrmen hakhmat.
Hynrei haba ngi peit ïa ka jylla lajong, ki don kiba pynwit ïa ki nongshong shnong kiba kwah ban ïoh ïa kitei ki jingangnud kumba la kdew haneng. Ki kmen haba kiwei ki saja namar nalade kim lah bad ïa kiwei ruh kim ailad. Namarkata, ngi shem ba ki kmie ki kpa kiba don lad don lynti, ki phah beit ïa ki khun jong ki shabar jong kane ka jylla. Kim kwah satia ïa ki khun ba ngin mad jingeh ha ka jingpule ne ha ka jingwad kam wad jam kumba ki la mad ïalade mynshwa. Wat ki bym da don lad than ki leit wad da ka ram ka shah na ki ‘riew shimet ne na ki jaka kynshew pisa tang ban ïoh phah ïa la ki khun shajngai na la ïing. Mano bym pangnud bad kynjah haba ki khun ki don shajngai? Hynrei ka dei ka jingbym banse namar ki kmie ki kpa bad ki khun ki kti jong ki, kim ïohi ïa kata ka jingkyrmen ban kiew arted da kaba shong duh ha kane ka jylla lajong. Kim banse ban song ïa ki tiar ki tar bad ki jaiñ ki nep bad ban phet bak sha ri nongwei. Sha ri nongwei, ki kmen ki sngewbha ba ki ïoh ban pule bad trei da ka jingkylluid mynsiem khlem don kiwei ki ar ban pynthud ïa ki. Ki sngewthuh ba lada ki shu kut tang hangne, kin ym poi shano-shano. Kiba kum kine ki dei kita ki nongshong shnong kiba don ïa ka jingkyrmen ban kiew arted ha ka jingim bad kiba sheptieng ïa ka jinghiar arsut.
Ngi ïohi ba ha kine ki sngi, ki don ki nongshong shnong jong ngi kiba la jied ban leit trei kum ki ‘Nurse’ shaduh sha ri Japan. Ki la shah hikai ban kren ïa ka ktien Japanese, bad mar ïa dep, bak ki leit sha ri nongwei ban trei shitom bad ban kamai jakpoh. Ngi ai burom ïa kiba kum kine ki samla kiba shlur bad kiba sngewthuh ban pyndonkam ha ka rukom kaba dei ïa la ka jong ka bor bad ka sap. Ngi khmih lynti bad ngi kyrmen ba kin dang don shuh sa kiwei pat ki samla ki ban bud ïa ki dienjat jong ki da kaba leit shabar jylla ne shabar ri ban tyngshaiñ ha ka kam. Ki samla kim dei ban khmih lynti than shuh na kane ka jylla. Wat ïa lapmiet ban shah peit khmat ha kiwei. Khie leit shabar ban trei shitom, trei minot khnang ba phin ïa bha ïa miat. Kumba ka long mynta, ka Meghalaya ka dei ka jylla kaba la duh jingkyrmen. Ngim kynnoh ïa ka sorkar ne ïano-ïano, hynrei kaba ka nusib ka la thoh kumta ba kan hiar arsut, ym don kiba lah ban leh eiei. Ki samla kim dei ban pynsepei ïa la ka por bad ka sap kaba ki don da kaba set kut ïalade ha Meghalaya, kan long lehnohei bad kin kut tang ha ki jingbabe suda.
Kiba bun na ki nongshong shnong na kane ka jylla kiba la sah bad trei shabar, kim da don mon shuh ban wanphai bad ban ai kylla sha ka imlang-sahlang. Ki la mad la biang ïa ki jingeh ha ki sngi ba ki dang don shane. Sa tang kumno eh ba kin wanphai biang. Hynrei kiba bun hi ki bat shkor. Ngim kynnoh ïa ki. Ngi sngewtynnad pynban ba ki kmen bad ki ïoh ïa ki jingangnud haba ki shong shabar na Meghalaya. Kin kyrmen kumno haba ki surok ha nongbah Shillong ki neh kumjuh? Haba kiba pan surok kim treh ban ai pat ïa ka jaka ban pynheh surok? Haba ka jingïapher hapdeng u bariewspah bad u baduk ka la nang ïar kat nang mih ki snem? Haba ka jingburom bad jingri jingsumar ïa ka mei mariang ka la ïap? Haba kiba wan kai sha kane ka jylla kaba don ïa ki lum ki wah ba i thiang ki shah pynhiar na ki kali la kumba ki dei ki poiwir? Haba ka jingburom para briew kam don shuh? Haba ka jinglapmiet ban ïa pynmih daw kam kut shuh? Ka jingdum suda kaba ker sawdong bad kaba pynduh jingkyrmen.
Namarkata, na kane ka rynsan, ngi kyntu ïa ki kmie ki kpa ba kin trei shitom ban phah noh ïa la ki khun ki kti shabar jong kane ka jylla. Ynnai pynlut kai hangne. Bei tyngka ha la ki khun ba kin pule sha ki skul, kolej bad skulbah kiba biang bad kiba don shajngai na Meghalaya. Ka lawei hangne ka long kaba dum. Ngin ym kiew arted bad kin nang ïai hiar arsut. Wat ailad ba ki khun kin ïadon bynta kaba kum kata ka lawei. Kyrshan ïa ki ba kin long briew man briew ha ki liang baroh. Lada ki kwah ban wanphai ruh, pynshlur ïa ki ba kin bteng ïa ki jingpule bad jingtrei shabar. Hadien katto katne phin sa shem ba ka long shisha ka jingkyrkhu. Wad shah ba kin ïadon bynta ha ka lawei kaba dum ngaiñ bad ka bym wanrah jingmyntoi eiei. Ailad ba kin im ïa ka jingim ba laitluid bad kaba kmen, kaba lait na ki jingma jingtieng, kaba lait na ki jingshah pynthud, kaba lah ban ai jingkyrmen bad jingshngaiñ, bad ka ban tei ïa ki ha ki liang baroh.