Shillong, Naitung 26
Ka Dorbar Synrai jong ka Ïingdorbar Thawaiñ kaba khatwei ka Jylla kan sdang ha ka 23 tarik Nailar bad kut ha ka 30 tarik Nailar.
Ka jingpynbeit ïa ki sngi ban pynlong ïa ka Dorbar Synrai la shim ha ka jingïalang jong ka Business Advisory Committee (BAC) jong ka Ïingdorbar Thawaiñ kaba khlieh da u Lamphang u Thomas A Sangma.
Haba kren sha ki lad pathai khubor hadien ka jingïalang, u Lamphang u la ong ba ka BAC ka la mynjur ïa ki sngi ban pynlong ïa ka Dorbar Synrai ha kaba ki sngi ban shong dorbar ki long san sngi, kata naduh 23 tarik Nailar haduh 30 tarik Nailar.
Haba kylli shaphang ka jingpynkylla ïa u nongïalam ka Liang Pyrshah ha Ïingdorbar Thawaiñ, u Lamphang u la ong ba ïa kane ka mat ym pat don kano-kano ka jingshim rai bad na ka liang jong u, u la dep pynpaw teng ha kaba ïadei bad kane. Kumta u la ong ba lada don kano-kano kaba dei ban shim rai lehse kan sa don pat kham hadien.
Haduh mynta, ki seng kiba don ha ka Liang Pyrshah ki khlem pat phah kano-kano ka jingthoh sha u Lamphang ka Ïingdorbar Thawaiñ na ka bynta ban leit kam ïa ka kyrdan nongïalam ka Liang Pyrshah hadien ba ka Congress kaba bat ïa kane ka kyrdan ka la don sa tang 4 ngut ki MLA namar ka jingiehnoh kam u Saleng A Sangma kum u MLA hadien ba u la shahjied kum u MP ka Lok Sabha na Tura parliamentary konstitwensi.
Haduh mynta u nongïalam ka Liang Pyrshah u dei u MLA ka Congress na Mylliem konstitwensi, u Bah Ronnie V Lyngdoh. Hynrei ka seng Liang Pyrshah kaba kham bun paid ka dei ka All India Trinamool Congress (AITC) namar ka don 5 ngut ki MLA. Katba ka Congress bad VPP ki don mar 4 ngut ki MLA.
