Tura, Naitung 28
Uwei napdeng kiba khyndiat ngut eh ha ka thaiñ Shatei Lam Mihngi baroh kawei, u Pilot ka Air India ba la slem ha ka kam, u Capt. Avante Sangma u la kyntu ïa ki samla bad kito kiba don ka jingangnud ban phai khmat bad pynïasoh sha ki tnad liengsuiñ na bynta ka lawei ba phyrnai.
U khun jong u MLA barim, u Lt. Atul C. Marak, u Avante u la shakri ha ka Air India la palat 15 snem mynta kum u ‘Commander’, bad u pynpaw ba ym donkam ban phai khmat shawei pat lait na ka Air India lyngba ka ‘Cadet Pilot Program’, ha kaba u sngew ba ka jingphohsniew ban her sha suiñ ka lah ban urlong na bynta kito kiba thrang bad angnud shisha.
“Phi lah ban ïoh jinghikai na ki nonghikai pynher liengsuiñ kiba la slem ha ka kam bad ba la pyntbit bad shah hikai ruh ha ki kor teknoliji bad tiar liengsuiñ kiba paka ha ka shlem ai jinghikai. Pynïasoh bad ngi ha ka jingïaid lynti kaba shitrhem bad ka ban wanrah jingkylla ha ka jingsngewtynnad jong phi ïa ki liengsuiñ na bynta ka lawei sha ki kyrdan ba halor – ka ban pynkhreh ïa phi ban sngewthuh ïa ki jingeh bad kumno ban jop ïa ki,” la ong u Avante ha ka jingïakren.
La khmih lynti ba ka Air- India, hapoh ka kynhun TATA kan sa long ka tnad treikam liengsuiñ kaba heh tam ha ka pyrthei hadien-habud.
Ha kajuh ka por, u Avante bad uba shipara bad u, u Pablo Sangma ki long napdeng ki katto-katne ngut ki Pilot napoh ka Jylla kiba don bynta ha ki karkhana liengsuiñ.
“Ka kam ym tang ba ka long kaba ïohnong hynrei kaba don burom, naba bun ki nongïalam ‘riew pawkhmat bad ki tyngshop ki puron ki la long teng ki Pilot, ba kynthup ïa u Myntri Rangbahduh barim ka ri, u Rajiv Gandhi, President ka Amerika, J.F. Kennedy, nongrwai ka kynhun tem ‘Iron Maiden’, Bruce Dickinson, Jim Reeves, Tom Cruise, John Travolta nalor kiwei-kiwei,” u la ong.
“Nga kwah ai mynsiem ïa ki samla ban wan shakhmat bad pynïasoh ïa ka prokram. Hadien ba la pyndep ïa ka jingshah hikai, yn kynthup ïa ki ha ka Air India. Uwei na ki para Pilot jong nga na Arunachal Pradesh, Takar Toko, uba la pynïasoh ha u snem 2017 u la kiew kyrdan bad nga kyrmen ba kiba bun na Meghalaya kin sa ïadon bynta lang,” u la ong.
Ka jingtip ba kham bniah ïa ka prokram, lah ban leit lyngba ka – https://cadetpilot.airindia.com.
“Wat la kam long kaba suk ban poi sha ka thong bad seisoh ha kane ka prokram, ki la don ki jingkylla bad ki la don bun ki lad ki lynti. Hashuwa, ha ki snem 1990, ka jingpule ïa kane ka laiñ ka long ka lyngkor bah ïa ka ïing ka sem namar ka jinglut-jingsep kaba heh, katba ka ‘Cadet Pilot Course’ da ka ‘Air India’ ka long kum ka jingpdiang sngewbha. Kum uwei uba la don ha kane ka kam la slem bha, nga lah ban btin lynti ïa ki samla kiba kwah ban pynrung kyrteng,” la ong u Capt. Avante.
“Phi don ka jingkitkhlieh jong palat 400 ngut ki jingim briew ha kti jong phi bad kumta, ka jingai jinghikai kan long kaba jwat. Hynrei kaba sngewtynnad ka long ba ka jingïoh ka long kaba biang nalor kiwei-kiwei ki jingmyntoi,” u la ong.
