Tura, Naitung 28
Ka TMC ha Ri-lum Garo ka la kyntait ban pdiang ïa ka jingpynshai jong ka MPSC halor ka jingkhmih bniah biang ïa ki sla ‘OMR’ bad dawa ba dei ban don ka jingtohkit laitluid haba ïadei bad kane ka bynta.
“Ngi kyndit bad ngim sngew lah ngeit ïa ka jubab jong ka MPSC, ka bym shym la shimkhia ïa ki jingkynnoh halor ka jingïadei baha-ïing/paralok ne jingshah liang. Da kaba khapbrib khmat ïa kine, ka MPSC ka pyrshang ban buhrieh ïa ki. Ka jingbym don ka jingkhuid-jingsuba bad ka jingkitkhlieh ha ka jingkhmih bniah biang ïa ki ‘OMR’ ka long ka bym lah pdiang ,” la ong u nongïalam seng samla ka TMC, u Richard Marak ha ka Sngi U Blei.
U Marak u la dawa ïa ka jingtohkit laitluid bad pura kaba mardor halor kane ka kam, ba kynthup ïa ki bynta ba ïadei bad ka jingkhmih bniah biang, jingjied kyrtong, bad ki jingkynnoh bym biang da kaba bynrap ba ka jingkhmih bniah ka bym pat ju ïohsngew mynno-mynno kam shai ha ki nongrim ba ïadei bad ka aiñ bad ka bym pat ju jia koit.
“Ki la mih ki jingsngewkhia haba ïadei bad ka jingshah liang (kaba lah ban don) ha ka thup kyrteng kaba mih hadien, kaba kdew ïa ki jingmyntoi ki bym ïahap satia na bynta ki ‘riew shimet kiba don jingïadei bad ki ‘riew pawkhmat. Kine ki jingkynnoh ki donkam ïa ka jingtohkit laitluid bad bniah ban pyntikna ïa ka jinglong khuid bad ka jingbym shah liang,” u la bynrap.
U Marak u la buh jingkylli ruh halor ka jinglong hok katkum ka aiñ jong ka thup kyrteng kaba pynmih hadien naba i kumba ka pynkheiñ ïa ka ‘Advertisement Paragraph 8(1)’, kaba kdew shai ba ka jingdon ki kyrtong kiba shah khot sha ka ‘Main Examination’ kan ym tam ne palat ïa khatsan (15) shah ka jingdon ki jaka bym pat pyndap ba la pynbna.
“Lada ka thup kyrteng (ba la pynmih hadien) jong ki 62 ngut ki kyrtong ka palat ïa kaei kaba la shah – 15:1, kan long ka jingpynkheiñ kaba shai ïa ka kyndon, kaba nang pynskhem shuh-shuh ïa ka jingdonkam ïa ka jingtohkit. Ki jingleh ka MPSC ka lah ban ïa peiñ ïa ka jinglong hok jong ka jinglong-jingman ka eksamin,” u la ong.
