Shillong, Naitung:
Ka Toyota Kirloskar Motor (TKM) ka la ai ka jingïaroh bad jingkyrshan ba pura ïa ka mang tyngka kaba la pynbna mynta ka sngi, da kaba ïaroh ïa ka buit treikam kaba pynïaryngkat ïa ka jingpynroi ïa ki jingtei, ka bha jingmiat ha ka imlang-sahlang, bad ka jingpynneh pynsah ïa ka mariang.
Na ka liang u Vikram Gulati, u Country Head bad Executive Vice President Corporate Affairs & Governance ka TKM, u la ai ka jingïaroh ïa ka jingpynïaid pisa kaba stad jong ka sorkar, da kaba buh thong ïa ka Fiscal Deficit ha 4.9% bad buh ruh hakhmat eh ïa ki jingtei bad ki jingbei tyngka ha ka imlang-sahlang.
U Gulati u la pynpaw ruh ïa ka jingthmu jong ka mang tyngka ban kyntiew ïa ka rep ka riang bad ban ailad ïa ka jingïashim bynta jong ki kynthei ha ki jait jingtrei bapher bapher, kaba jong shibynta ban pynïar ïa ki jingmyntoi jong ka jingroi ka ïoh ka kot. Ka mang tyngka ka kyrshan pura ruh na ka bynta ki MSME bad kumjuh ki karkhana pynmih tiar kiba dei ki bynta ba kongsan eh ban kyntiew ïa ka GDP jong ka ri.
Ka jingpynleit jingmut ha ka jingkylla ha ka bor ding bad ka jingtreikam ha ka liang ka jinglong ka suiñbneng ka ïadei bad ki thong jong ka TKM ban pynneh pynsah, kynthup ïa ka jingkular jong ka ban pynduhjait ka Carbon ha u snem 2050. U Gulati u la ïiaroh ruh ïa ki jingthmu jong ka mang tyngka na ka bynta ka jinghikai bad ka jingpynroi ïa ki sap, khamtam eh ïa ka prokram treikam bathymmai ba la bei tyngka da ka CSR kaba long shi bynta ban pynïohkam-iohjam ïa ki samla pule.
