Shillong, Naitung 28
Ka Jylla Meghalaya ka la ïoh da uwei pat u Lat ha kaba ka President jong ka ri ka la thung ïa u Chandrashekhar H. Vijayashankar ban shimti ha ka jaka jong u Lat uba mynta, u Phagu Chauhan uba la kut ka samoi jong u san snem.
U Chauhan u la shah thung kum u Lat na bynta san snem. Ha kine ki san snem u la shimti kum u Lat ka Bihar naduh ka 29 tarik Naitung, 2019 haduh 13 tarik Rymphang, 2023. Hadien kane u la shah pynkynriah noh kum u Lat ka Meghalaya naduh ka 18 tarik Rymphang, 2023 haduh 29 tarik Naitung, 2024.
Ka President ka ri ka la thung thymmai ïa u Lat ha ki katto-katne ki Jylla kynthup ha Meghalaya ha kaba la pynmih ïa ka jingpynbna ha ka Sngi Saitjaiñ.
U Vijayashankar u dei u nongïalam saiñ pyrthei na Karnataka bad u la long teng u dkhot ka Karnataka Legislative Assembly bad kum u MP ka Lok Sabha na Mysore Lok Sabha constituency ha ki snem kiba la leit.
U la long teng ruh u dkhot ka Karnataka Legislative Council bad u dei ruh u nongïalam uba la ju don teng bad ka BJP bad ka Congress.
Ha u snem 2017, u Vijayashankar u la mih noh na ka BJP bad u la leit pynïasoh bad ka Congress, hynrei ha u snem 2019 pat u la leit pynïasoh biang bad ka BJP.
Haba ïakren bad katto-katne ngut ki nongïalam saiñ pyrthei ki la ong ba ki briew kiba shimti kum u Lat ka Meghalaya kham bunsien ki dei beit kiba ju donbynta ha ka saiñ hima lait noh tang katto-katne kiba don ha ki kyrdan bapher-bapher ban shakri ïa ka ri kum ki shipai, ne heh pulit bad ophisar.
“Ki briew kiba na ka thaiñ Shathie jong ka India kham bunsien ki dei kiba kren ïa ka ktien lajong jong ki bad ki kren ruh ïa ka ktien phareng. Une u Lat bathymmai ruh khlem pep un dei uba nang ïa ka ktien phareng,” la pynpaw uwei na ki nongkitkam ka Jylla.
