Jop ka BJP da 70% ha ki Panchayat konstitwensi khlem don nongïakhun pyrshah

Agartala, Naitung:

Ka BJP kaba bat ïa ka jingsynshar ha Tripura ka la jop kumba 70 percent na ki konstitwensi ha ki lai kyrdan ha ka Panchayat jong ka jylla khlem da ïakhun, la ong uwei u heh sorkar ha kine ki khyndiat sngi ba la leit.

Ki don baroh 6,889 tylli ki konstitwensi ha ka rukom pyntreikam hapoh ka Panchayat,  kaba kynthup ïa ki Gram Panchayat, ki Panchayat Samiti bad ki Zilla Parishad, bad ka BJP ka la jop haduh 4,805 tylli ki konstitwensi khlem da ïakhun, u la ong.

Ha ki Gram Panchayat, ka BJP ka la jop haduh 4,550 na ki 6,370 tylli ki seat ki bym don jingiakhun, kaba mut ba yn nym pynlong ïa ka jingthep vote ha ki 71 percent ki konstitwensi.

Ha ki 1,819 tylli ki Gram Panchayat ba yn pynlong ïa ka jingthep vote, ka BJP ka don ïa ki kyrtong ha ki 1,809 tylli, ka seng CPI(M) ka la pynïeng kyrtong ha ki 1,222 bad ka Congress ha ki 731 tylli, la ong u Secretary jong ka State Election Commission (SEC) u Asit Kumar Das.

Ka seng ba la ïatreilang bad ka BJP ka Tipra Motha ka la pynïeng kyrtong ha ki 138 tylli ki konstitwensi, u la ong.

Ïa ka ilekshon yn ym pynlong kyrkieh ha kawei na ki konstitwensi ha Maheskhala Panchayat kaba don haWest Tripura district ha kaba u kyrtong ka BJP u la khlad noh, u la bynrap.

“Ha ka Panchayat Samitis, ka seng BJP ka la jop haduh 235 lane 55 percent na baroh ki 423 tylli ki konstitwensi naba ym shym don ba ïakhun. Ïa ka jingthep vote ba mynta yn sa pynlong na ka bynta ki 188 tylli ki konstitwensi,” la ong u Das.

“Ka BJP ka la pynïeng kyrtong ha baroh ki 188 tylli ki konstiwensi, katba ka seng CPI(M) bad ka Congress ki la pynïeng kyrtong ha ki 148 bad 98 tylli. Ka Tipra Motha ka la pynïeng kyrtong ha ki 11 tylli ki konstitwensi,” u la ong.

U Das u la ong ba ka BJP ka la jop 20 tylli na ki 116 tylli ki Zilla Parishad khlem don nongïakhun, kaba long kumba 17 percent.

Ka BJP ka la pynïeng kyrtong ha baroh ki 96 tylli ki Zilla Parishad konstitwensi ha kaba yn sa pynlong ïa ka jingthep vote, katba ki kyrtong ka CPI(M) bad ka Congress ki don ha ka jingïakhun ha ki 81 bad 76 tylli ki konstitwensi.

Ka tarik ba khatduh ban weng kyrteng kum ki kyrtong ka la long ha ka 22 tarik, Naitung, katba ka jingthep vote la buh ban pynlong ha ka 8 tarik Nailar bad ïa ki vote yn ñïew ha ka 12tarik Nailar.

Ka BJP ka la jop haduh 96 percent ki konstitwensi ha ka Panchayat kaba lai kyrdan khlem don ba ïakhun pyrshah ha ka ilekshon ba la dep.