Shillong, Naitung 28
Ka Nongstoiñ District Sports Association (NDSA) bad ka Ri-Bhoi District Sports Association (RBDSA) ki la long ar tylli ki synjuk kiba la ïoh jingjop suk ha ka kylla ba-ar jong ka Meghalaya Youth League 2024, ha kaba ki la lah ruh ban bteng ïa ka jingjop ha ka U-14 bad U-16 ha ki zone ki jong ki.
Haba phai sha ka jingïalehkai kaba la long ha ka sngi Saitjaiñ, ka Ri-Bhoi ka la pynliem noh ïa ka Riwar Mihngi Football Association da 9-0 kol ha ka kyrdan U-14 bad da 6-0 kol ha ka kyrdan U-16 jong ka Zone C kaba la long ha UUP Stadium ha Pynursla.
U Ribanshan Kyrsian u la ïoh ban khyrwit ïa ka hat-trick na ka bynta ka Ri-Bhoi ha ka jingïalehkai jong ka kyrdan U-14.
Katba ka Nongstoiñ pat ka la pynliem noh ïa ka Mawkyrwat District Sports Association da 3-0 kol bad da 2-0 kol ha ka kyrdan U-14 bad kyrdan U-16 jong ka Zone D.
Ka Nongstoiñ bad Ri-Bhoi kiba la jop ha baroh ar tylli kyrdan ha ka taïew ba la dep, mynta baroh ar ki la khur mar 6 point na ki Zone ki jong ki.
Ka kynhun ïalehkai U-14 jong ka Pyndengumiong District Sports Association ruh ka la khur 6 point pura hadien ba ka la jop pyrshah ïa ka Tyrsad Area Sports Association da 2-0 kol ( ha ka Zone D). Hynrei, ka kynhun ïalehkai U-16 ka Pyndengumiong pat ka la shah pynliem noh ha ka Tyrsad da 4-0 kol.
Ki jingïalehkai U-16 jong ka Zone A ruh ki la sdang ha ka sngi Saitjaiñ, ha kaba ka Williamnagar District Sports Association ka la jop pyrshah ïa ka Tura District Football Association da 6-2 kol, kaba la wan urlong ruh lyngba ka hat-trick ba la thep da u Vrickan N Sangma, uban dei ruh uba nyngkong ban khyrwit hat-trick ha ka kyrdan U-16.
Haba phai sha ka jingïalehkai U-14 ka Zone A, ka North Garo Hills District Sports Association ka la pynliem noh ïa ka Baghmara District Football Association da 7-0 kol, ha kaba u Negsim Ch Momin marwei u la khyrwit haduh saw tylli ki kol.
Katba ha ka Zone B, ka West Jaintia District Sports Association kaba la mih ban ïakhun ha ka sien nyngkong, ka la khur jingjop ha ka U-14 da 5-1 kol bad kumjuh ruh ha ka U-16 da 1-0 kol pyrshah ïa ka East Jaintia District Football Association kaba la long ha Kiang Nangbah Stadium, Jowai.
Kumjuh ruh ka Laskein Block Sports Association ka la jop ïa ka jingïalehkai jong ka kyrdan U-14 da 2-0 kol pyrshah ïa ka Saipung Block Sports Association katba ha ka U-16 pat ka jingïakhun hapdeng ka Laskein pyrshah ïa ka Saipung ka la kut ha ka jingïakhaid da mar shi kol.
