Shillong, Naitung:
U Shri Ashishkumar Chauhan, MD bad CEO jong ka National Stock Exchange (NSE), u la pynpaw ïa ka jingmynjur kaba khraw ïa ka dorbar mang tyngka 2024, da kaba u la ïaroh ïa ka halor ka jingphai khmat sha ki lad aikam-aijam bad ban kyrshan ruh ïa ka seng kam-seng jam lajong. U Chauhan u la ban halor ki mat ba kongsan ïa kaba la kren da ka myntri ka tnad pla tyngka ka Nirmala Sitharaman kiba long ki mat kiban nang kyntiew shuh shuh ïa ka ïoh ka kot.
U Chauhan u la ai ka jingïaroh ïa kane ka dorbar mang tyngka kaba la ban jur halor ki ar tylli ki mat ha kaba ïadei bad ka jingthaw ïa ki lad aikam-aijam la ka long ha ki jaka trei ki riew shimet bad ha ki jaka treikam sorkar. U la kdew ba ki sienjam ba la shim ha kane ka dorbar mang tyngka, ka kynthup ïa ka jingpyllait ïa ka jingsiew khajna ba la tip kum ka Angel Tax bad ban nang kham pynheh shuh shuh ïa ka jingairam ba la tip kum ka Mudra Loan Scheme ba ka 10 lak tyngka sha ka 20 lak tyngka na ka bynta uwei u briew, ïa kaba la saiñdur ba kan nang lah ban kyntiew ïa ka seng kam-seng jam bad pynshlur ïa ki briew ba kin sdang ïa ki kam lajong.
Nalor kane, u Chauhan u la pynpaw ba ha kane ka dorbar mang tyngka la phai khmat ruh kumno ban kyntiew ïa ki kynthei ba kin ïashim bynta ban trei ïa ki kam-ki jam bapher bapher, ïa kaba la khmih lynti ba ki briew kiba treikam ki nang bun. Ha kane ka dorbar mang tyngka la phai khmat ha ka liang ban kyntiew ïa ki sap ki phong jong ki briew, kumjuh ruh ka jingmang tyngka ban tei ïa ki jingtei bad ka jinglah ban pynhiar ïa ka Fiscal Deficit sha ka 4.9% ne ka jinglah ban pynhiar ïa ka jinglut bad pynbun ïa ka jingïoh, ruh la ïakren. U Chauhan u la ïaroh ïa ka jinglah ban pynbiang hapdeng ka jinglut bad ka jingkiew ha ka ïoh ka kot, da kaba ai jingïaroh ïa kane ka dorbar mang tyngka kaba la wanrah ïa ki sienjam kiba biang ba bit. U Chauhan u la pynpaw ba kane ka dorbar mang tyngka kaba mynta ka long kaba biang tam bad u la ong ba ka long 10/10 namar ki sienjam kiba bit ba biang ha ki sngi bad ki por ban wan.
