Mawkyrwat, Naitung 28
Ka KSU South West Khasi Hills District bad ka KSU Balat Border Area Circle lyngba ka kyrwoh khubor ka pynpaw ïa ka jingsngewkhia kaba jur halor ka jingïoh laitlan ki nong Bangla-desh ban wan kiew laitluid shaduh jan shnong Dangar, East Khasi Hills District ban wan tuh maw.
Ka seng lyngba ka kyrwoh khubor na u samla Forwardman No-ngrem, President KSU South West Khasi Hills District ka la pynpaw ïa ka jinglyngngoh halor ka jingbym shimkhia ki shipai Border Security Force (BSF) kiba don ha Dangar Border Outpost (BOP) kiba la pyllait laitlan ïa kine ki nong Banglaseh bad kim lah ban leh eiei.
Ka seng ka la kynnoh ruh ba imat ba kane ka jingleh ki BSF ka pyni ba ka lah ban don ka jingïasngewthuh jingmut hapdeng ki shipai ïada khappud (BSF) bad ki nong Bangladesh.
U samla Forwardman lyngba ka kyrwoh khubor u la ong ruh ba kane jingleh ki BSF kan buh jingma ïa ka jaidbynriew namar pynsuk ïa ki bym dei ki nong India ban shim ïa kine ki ktem shipai kum ki jaka rung tuh bad na kine ki jaka kin kiew bad leit buhai shnong sha kiwei-kiwei ki jaka jong ka bri u Hynñiewtrep.
Kumta ka seng ka dawa ïa ki bor distrik jong ka East Khasi Hills District bad kumjuh ka South West Khasi Hills District ba ki dei ban tuklar mardor halor kane ka bynta lem kumta na ka liang ka seng kam banse ban hap hiar hi dalade sha kito ki thaiñ.
