Shillong, Naitung 28
Ka Manu Bhaker ka la thaw khana-pateng (history) da kaba khur ïa ka takma ba nyngkong na ka bynta ka India ha ka lympung 2024 Paris Olympics, da kaba khur ïa ka takma rnong ha ka jingïalehkai 10m Air Pistol Final ha ka sngi U Blei.
Ka Manu Bhaker ka la pyndep ïa ka jingïakob jong ka, hadien 22 tylli ki jingsiat, bad ïoh haduh 221.7 ka point, bad ban duna tang da 0.1 ban poi ha ka kyrdan ba ar, ba la ïoh da u Yeji Kim.
Da kaba khur ïa ka takma rnong, ka Bhaker kaba dang 22 snem ka rta, ka la lah ban pynkut noh ïa ka jingïaid lynti kaba 12 snem jong ka India, khlem da ïoh khur takma Olympic shuh ha ka Shooting, bad ruh ban kylla long ka kynthei kaba nyngkong ban khur takma na ka bynta ka India.
Ka Bhaker ka la sdang ïa kane ka jingïakhun ha ka rukom kaba paka da kaba kamai lypa 50.2 point tang na ki 5 tylli ki jingsiat (shots), kaba la kyntiew beit ïa ka sha ka kyrdan kaba ar, kata hadien jong ka Ye Jin Oh na South Korea, kaba la kamai 52.2 point.
Hynrei hadien sa san tylli ki jingsiat, ka Ye Jin Oh bad Kim Yeji kiba na South Korea ki la lah ban tam ïa ka Bhaker bad pynlong pat ban hiar sha ka kyrdan balai.
Haba poi sha ka bynta ba 21 jong ka jingïasiat, ka Bhaker ba la thikna ka takma ka la tam ïa ka Kim Yeji da 0.1 point, hynrei ka Yeji ka la lah ban knieh biang ïa ka kyrdan ba ar ha ka jingïasiat kaba 22 bad ban tam kylla pat da 0.1 points.
