Shillong, Naitung 28
U President ka Khasi Students’ Union (KSU), Bah Lambokstarwell Marngar, u la ong ba haduh mynta kim pat don ki bar jylla kiba wan biang ban bylla sha Meghalaya naduh ba la shah beh namar bym biang kot bym biang sla.
U Bah Lambokstar-well u la ïathuh ba lada u briew um biang ka bylla un nym wan sah ha jylla hynrei haba u sngewthuh ba ka kam bylla ka biang u kwah ban pynlong ïalade kum u trai shnong.
Nalor nangta, u la ïathuh ba ha ka jingïakynduh ki sengbhalang bapher-bapher ha Shillong mynshem taïew ka long ban ïakren halor ka jingsdang jyllei ki nongbylla ki bym biang kot biang sla.
U la ïathuh ban khynra ïa ki nongbylla don-kam ban leh baroh kawei ka jylla.
Namar kata, u la kyntu ïa ki kontraktor haba ki ïoh jingtrei kiba heh ki dei ban shim jingkitkhlieh ban wanrah ïa ki nongbylla kiba biang kot lym kumta ka seng kan nym shah ban wanrah nongbylla kiba nabar.
Nalor kane, u la ong naduh ba ka seng ka la sdang naduh 6 tarik Naitung ban khynra bar jylla ïa ki bym biang kot bad haba ki dkhot ka seng ki la peit biang kim pat lap ba kin wanphai biang.
Shuh shuh u la ong ba ka jingïapher hapdeng ka Work Permit bad ka MRSSA ka long ba ka work permit ban pyrkhing tang ïa ki nongbylla katba ka MRSSA ka kham piar ki thapniang namar ka la peit lut ïa baroh ki briew haba ki wan hapoh ka jylla namar la pynïeng da ki khyrdop.
U la ong katba ka sorkar jylla ka dang eksamin ïa ki aiñ ba la dawa, ka seng kan dang bteng ban khynra bar jylla kiba wan trei khlem kot ki sla kiba biang.
U la ong ba ka sorkar ka la wanrah ïa ka aiñ thymmai ha ka work permit, hynrei ki lap ba ka dang duna palat namar la phah siew tang 300 tyngka ym donkam EPIC, ym donkam Adhaar ki la ïoh ban rung, bad kane ka long kaba mynsaw.
U la ong mynshwa ha ka work permit la pyni lang ïa kyrteng kontraktor bad ka jaka ba u trei hangno, hynrei haba la pynkylla biang ha u snem 2020 ka khlem kdew u nongbylla u trei badno, haei ka jaka la shu ai laitlan beit.
