Nongstoiñ, Naitung 28
Ka Khasi Students’ Union ( KSU) Misei Unit hapoh ka jingïalam jong u samla Before Nachugre, Assistant General Secretary lem bad ki dkhot ha ryngkat ki nongïalam shnong jong ka shnong Misei, u Chester Ryntong kum Secretary Shnong ha ka Sngi Saitjaiñ ki la ïoh ban leit jurip ïa ka Sub-Center kaba hap hapoh ka shnong Nongmisei, West Khasi Hills District.
Ki nongkitkam ka KSU ki la ong ba ha ka jingleit jurip la lap ïa shibun ki jingduna ha katei ka jaka ai jingsumar kum ki jingthiah, jaka leitbar, jaka sait kti, jaka ap, ‘pipe’ um, jaka buh ñiut, ka jingker kut ïa katei ka jaka ai jingsumar, jaka theh ñiut, thyrnia injek , ki dawai, nalor kiwei.
Ki la ïathuh ruh ba kumba long mynta katei ka jaka ai jingsumar wat ka tnum ruh ka la jaw, ka bording ruh kam biang bad ka um ruh kam biang ha katei ka Sub-Center kaba buh jingeh shibun wat ïa kiba trei hangtei namar don ki nongpang ba wan ha ka miet ka ïong bad kumta ka buh jingeh bha ïa kiba trei ha katei ka jaka sumar.
La ïathuh ruh ba ki nos ha katei ka jaka sumar ki don tang 2 ngut bad kane ruh ka buh jingeh shibun namar kane ka jaka ai jingsumar ka peit haduh 23 tylli ki shnong.
Shuh shuh ki nongïalam jong ka seng bad ki nongïalam shnong ki la buh jingkyrpad ba ki dei ban phah sah kawei ka ANM sha katei ka jaka namar ki kwah ba ki nos ba trei hangtei kin don tista ha ka jaka trei namar kane ka shnong ka la kham pajih na Riangdo CHC. Ha kajuh ka por, ka kyntu ïa ka Sorkar lem bad ka Myntri ba khmih ïa ka tnad ka koit ka khiah ban pynbiang ïa kitei ki jingduna ha katei ka jaka ai jingsumar khnang ba kan long ka jingmyntoi na bynta ki nongshong shnong jong katei ka thaiñ.
