Shillong, Naitung 28
Ka Jylla Meghalaya ka don hapdeng ka jingkyrduh nongbylla namar tang ki nongbylla kiba dei ki Khasi kim pat lah ban trei bad ym pat lah ban pyndap. Ka jingphet ki nongbylla kiba dei nabar Jylla ka dei namar ka jingsheptieng ïoh shah shoh bad shah pynïap ei, kumba la jia ha kiwei ki por.
La ong ba bun ki projek kiba heh jong ka Sorkar ki la suki bad yn nym lah ban pyndep kloi namar la duna ki nongtrei kumba ka long mynta.
Ka jingkhynra ïa ki nongtrei bylla kiba wan na kiwei ki Jylla katkum ka jingong ka KSU ka la kot sha ka 2500 ngut.
Ki katto-katne ngut ki kontraktor kiba shimwai pateng ban pyntrei ïa ki projek ki la ong ba bun na ki nongtrei bylla ki la kwah ban phet hi noh wat lada kam don ka jingkhynra ha ka jaka ba ki trei namar kim shngaiñ ïoh shah shoh shah dat bad poi sha u pud ban shah pynïap kumba ka la jia katto-katne bnai ka jingshah pynïap uwei u nongtrei bylla ha Mawlai Mawroh.
Ki ophisar Sorkar ruh ki kubur ba ki projek kiba heh khamtam eh kiba donkam ïa ki nongtrei kiba don ka jingshemphang bad jingtbit ïa ka kam ki la suki namar ym don nongtrei ban pynsted ïa ka kam.
Dang shen u Lamphang ka Ïingdorbar Thawaiñ u Thomas Sangma ruh u la ong ba ka jingtei ïa ka Ïingdorbar ha Mawdiangdiang ka ïaid hynrei ka kham suki namar baroh shikatta ki don ym duna ïa ka 200 ngut ki nongtrei bylla hynrei mynta ki don sa tang kumba 50 ngut ei ei.
Ki projek shna surok ruh ki mad jingeh ban ïoh nongtrei bylla namar ki nongbylla kiba wan nabar Jylla ki bun kiba la phet namar ka jingbym shngaiñ.
Dang shen u Symbud Myntri Rangbah u Bah Prestone Tynsong u la ong ba ym don hok mano-mano ban shim ïa ka aiñ ha kti khamtam ban shoh ban dat ïa ki nongbylla, bad lada lap ba kim pyndep ïa ka jingpynrung kyrteng bad kim don ki kot ki sla dei ban ujor sha ka Sorkar bad ka tnat kaba dei khmih.
U la ong ruh ba ki kontraktor ne kompani kiba donkam ban wanrah nongbylla nabar jylla ki donkam ban bud ïa ki kyndon namar ka jylla ka don la kajong ka aiñ ha kaba ïadei bad kiba wan trei bylla na ka bynta ban ithuh ïa ki bad kan long ruh ka jingshngaiñ ïa ki hi.
