Shillong, Naitung 28
Ka High Power Committee (HPC) kan ïakynduh ha ka Lah Sngi U Blei na ka bynta ban shim rai ban shah ïaid ïa ki kali kiba wan mar pyrshah na baroh arliang jong ka jingkieng ha dam Umïam.
Ïa ka jingïalang jong ka HPC yn pynïaid da u Myntri ka tnat bording u AT Mondal ha ka jingdonlang u Commissioner and Secretary ka tnat bording, u Sanjay Goyal uba dei ruh u Chairman-cum-Managing Director ka Meghalaya Energy Corporation Limited (MeECL), nalor kiwei kiwei ki ophisar ka MeECL bad kiwei ki tnat.
Ki riewshemphang ka IIT Guwahati, nalor ka DGP, PWD, bad ki bor district na East Khasi Hills district bad Ri Bhoi district kin sa shimbynta lang ha kane ka jingïalang ka HPC.
Kum ban pynkynmaw, ki kam ban maramot ïa ka jingkieng dam Umïam bad jingksam thliew ban theh dewbilat thymmai ïa ka jaka ba den ïa ka pung Umïam ka la sdang naduh ka shiteng miet jong ka 14 tarik Nohprah, 2023.
Ka jingpyrkhing ïa ki kali ban ïaid lyngba ka jingkieng Umïam ka la neh mynta la katto-katne bnai khamtam ka jingbym shah ïa ki kali kiba kit jingkit khia palat ïa ka 4 metric ton.
Ki kam ban maramot ïa ka jaka ba den ïa ka pung Umïam la leh lyngba ka Dam Rehabilitation & Improvement Projects (DRIP).
U Mondal u la ong ba ynda la pyllait ban ïaid ki kali na baroh arliang jong ka jingkieng, kiwei pat ki kam kiba dang sah yn pyntrei khlem kano-kano ka jingpynwit.
