Shillong, Naitung 28
Ka Hill State People’s Democratic Party (HSPDP) ha ka Sngi Saitjaiñ ka la pynpaw ïa ka jinglong kloi jong ka ban pdiang sngewbha ïa ka Voice of the People Party (VPP) sha ka Regional Democratic Alliance (RDA) – ka kynhun ïatehlok ki seng ‘riewlum ka Jylla ba kynthup ïa ka United Democratic Party (UDP) bad ka HSPDP.
“Ka jingthmu ba hakhmat eh jong ka jingïateh lok jong baroh ki seng ‘riewlum ka long ba ngin ïoh synshar ïa ka Jylla, ne ban ïoh ïalam – ngin da sngewkmen eh,” la ong u President ka HSPDP, Bah K.P. Pangniang haba kren sha ki lad pathai khubor.
Haba kdew ba ka jingbym don ka jingïateh lok kan pynlong ban shu leit snoh sah bad ki seng heh ka ri, u la ong ba ha ka synshar paidbah, lada phai sha ki khana mynbarim jong ka Jylla ne ka saiñ pyrthei jong ka India, ka long kaba shitom shi kat dei ban synshar hi marwei.
“Ngim lah ban kiar bad ngi ïohi ruh ba ka long kaba donkam ba ka jingïatehlok jong ki seng ‘riewlum kan don, khnang ban wanrah ïa ka synshar-khadar kaba da ma ngi ne ban ïalam hi da ma ngi, ki seng ‘riewlum,” u la ong.
Haba kylli la ka seng kan ïawer ne em ïa ka VPP sha ka RDA, u Bah Pangniang u la kubur ba naduh ba la seng ïa ka RDA, ka jingthmu ka long ba baroh ki seng ‘riewlum kin ïadon lang, ïa kdup lang bad haduh mynta ruh, ka kynhun ka don ïa kajuh ka nongrim.
“Ka jingthmu ngi don kajuh – ka jingïohi, jingangnud, kajuh ka jingkyrmen ngi ïohi ba kan don wat ban thaw ïa ka Sorkar lyngba ka jingïatehlok jong ki seng ‘riewlum,” u la ong.
U President u la ong ruh, “Ngi pdiang sngewbha ïa ka VPP ban don lang ha ka kane ka thup jingïateh lok kumjuh ïa kiwei-kiwei ki seng ‘riewlum. Kata ka dei kaba ngi la don jingmut lypa la slem bad haduh mynta.”
Haba jubab, u la ong ba haba kren halor ka jingïatreilang, lada don ka mynsiem ïasngewpher, kata ka jingïatehlok kam don jingmut.
U la ong ruh ba lehse ka lah ban don ka jingïapher ha ka por ilekshon, ne ki mat treikam, hynrei ka thong ban shakri ka long ïa ka ri bad ka jaidbynriew.
U la ban biang ba ha ka jingïatehlok ym dei ban don ka jingsngewpher, hynrei ban ïatreilang bad burom markylliang.
“Ban ïakynduh bad ka VPP kam pat don, hynrei naduh ba ngi don ha ka jingïatehlok, ka jingïakren jong ngi, ka jingkhot, jingwer jong ngi…ka la don ka jingïakren,” u la ong.
Kum ban shu kdew hangne, dang shen, ka UDP, ka la khot la wer ïa baroh ki seng ‘riewlum ba kynthup ïa ka VPP, ban ïatylli lang hapoh kawei ka shatri ban ïada ïa ka bha ka miat jong ki trai-ri.
Ka RDA ka la pynïeng ïa u kyrtong monlang ha kane ka ilekshon MP Lok Sabha kaba la long mynta u snem, hynrei ka la mad ïa ka jingshah rem kput ha kaba u kyrtong ka VPP u la jop donburom na kiba bun ki konstitwensi ha Khasi Jaiñtia.
