Shillong, Naitung:
Ka Khasi Students’ Union (KSU) ha ka Sngi Thohdieng ka la ïakynduh ïa u Chairman ka Meghalaya Public Service Commission (MPSC), Bah P.R. Marweiñ ban pan jingshai halor ka jingshah jied sa 62 ngut ki kyrtong na bynta ka eksamin Meghalaya Civil Service (MCS) hadien ka jingkhmih bniah ïa ki sla thoh jubab jong ka eksamin ‘Preliminary’ kaba la long ha u snem ba la dep.
“Ka eksamin jong ka ‘Prelims’ ka la dep bad ki la pynmih ruh ïa ka risol, hynrei hadien kane, ngi ïohi ba don kiba ujor halor ki jubab kiba bakla bad haba la khmih bniah, ki la pynrung biang sa 62 tylli ki kyrteng,” la ong u Chairman ka Employment Monitoring Cell (KSU), samla Reuben Najiar haba kren sha ki lad pathai khubor.
Haba kdew ba kane kam dei shuh ka sien banyngkong ba ka MPSC ka bakla bad thurmur haba phai sha ka thung kam thung jam khamtam haba ïadei bad ka Civil Service, utei u samla u la pynkynmaw ba ha u snem 2018-19, ka la don ka jingjia kaba ïasyriem kum katei ha kaba ki la don ruh ki kyrtong kiba la ujor mukotduma sha ka ïingbishar ka Jylla.
“Kawei ka jingkylli kaba ngi buh ha ki ka long ba mynta ki ai ïa kita ki 62 ngut…kaei ka ‘Cut-Off Marks’ ba ki buh, ngim tip, bad wat u Chairman ruh um da lah than ban jubab halor kane bad katno tylli ki jingkylli kiba bakla. Katkum ka jingïakren mynne, ki ong ba ki don 3 tylli ki jingkylli kiba bakla bad kita ki long 2 ‘mark’ bad 6 ‘mark’ bad lyngba ita i 6 mark ki ïoh ban pynrung haduh 62 ngut ki kyrtong,” la ong u samla Najiar.
U la pynpaw ruh ba ki samla nongthep kam na ka por sha ka por ki ud ki nam sha ka seng ba ka don ka jingleh shiliang ha ka MPSC bad bunsien la ïohi tang ïa ki khun jong ki heh ki haiñ ne ki Myntri kiba ïoh ban rung kam ha ki tnad treikam bapher-bapher.
“Ka seng ka buh ka jingdawa ba phi donkam ban pynmih ïa ki ‘mark’ jong baroh ki kyrtong kiba la ‘pass’ ïa kane ka eksamin ba la pynbna mynshem snem bad mynta u snem khnang ba kan don ka jingkhuid-jingsuba,” u la ong.
Halor ka jingbakla ha ka jubab jong ka ‘OMR Sheet’, u Chairman u la ong ba kane kam dei shuh ka sien banyngkong bad buh jingkylli ruh ba lada kita ki kynhun (agency/firm) kaba ka MPSC ka ai ban pynkhreh ïa ki jingkylli ki dang bakla, kata ban ai biang sha ki na ka por sha ka por, kin nang ïai bakla.
Haba ïadei bad ka kam ‘Statistical Officer’ ha ka tnad Veterinary, u la ong, “Ha u snem 2019, ka mih ka kam ‘Statistical Officer’ – ka mih tang kawei. Hadien ba mih jingpynbeit thymmai, ki pyni ba ka don tang kawei ka kam na bynta ka thup Khasi-Jaiñtia, hynrei ha kine ki khyndiat bnai ba la dep, ngi ïohi ba haba pynmih risol, ki don 2 ngut kiba ‘pass’, uwei na ka thup Khasi-Jaiñtia bad uwei na ka Garo.”
“Naei mih sa kane kawei, kine ki kynrum-kynram jong ka MPSC ki long kum kiei-kiei kiba pyndom ïa ki samla ba ka thung ka thung jam hapoh MPSC kam long kaba khuid,” u la ong.
Shuh shuh u samla Najiar u la bynrap ba ka seng ha kine ki sngi ban wan kan sa leit ïakynduh ïa u Myntri Rangbah ka Jylla bad lada jia ba kam ïoh ka jubab kaba biang, kan lum ïa baroh ki samla kiba ju mad ïa kum kine ki jingeh bad lada donkam yn ïa mih paidbah.
