Shillong, Naitung 28
Ki nongpynïaid ka ‘Paris Olympics’ 2024 ha ka Sngi U Blei ki la panmap na ki Katholik bad kiwei-kiwei ki kynhun niam Khristan hadien ka jingbitar kaba la pur ha kylleng ka pyrthei namar ka ‘Parody Tableau’ jong ka jingdro ‘The Last Supper’ kaba pyni ïa ki jingpynwandur ki bym ïahap ha ka jingïalang plie jong katei ka lympung ïaleh-kai.
Ka Communications Manager jong katei ka lympung ïalehkai, ka Anne Descamps, haba kren sha ki lad pathai khubor, ka la ong, “Ka long kaba shai ba ym don jingthmu ban pynjah burom ïa kano-kano ka kynhun niam. Ka jingïalang plie ka pyrshang ban rakhe ïa ka jingpdiang lang ïa baroh ki kynhun.”
Katei ka ‘Tableau’ ka dei kaba la pynwandur ïa ka jingdro ba la dro da u nongdro dur ba pawnam, u Leonardo Da Vinci, kaba kdew ïa ka jingsot na ka Baibil jong u Jisu Khrist bad ki synran jong u kiba la ïashong bam khatduh ha shuwa ba un shah sah narphna .
Katei ka ‘Tableau’ jong katei ka jingdro ka pyni ïa kiei-kiei ki bym ïahap, ha kawei ka liang kaba la pynsngewsih shi kat dei ïa ka Ïingmane ka Balang Katholik, la ong ki lad pathai khubor.
Hashuwa, u Artistic Director, u Thomas Jolly, u la ong ba um don jingthmu ban pynman kamkai hynrei ban phah ïa ka khubor jong ka jingieid bad jingkynthup lang khlem kano-kano ka ‘agenda’ ban pynïaphiah.
Katei ka jingjia ka la wanrah ïa ki jingpynrem jur na kiba bun balang kumjuh na u Myntri Rangbah ka Jylla, u Conrad K. Sangma.
Ha ka jingthoh ha ka rynsan lad pathai, u la ong, “Ka jingsngewsih jur halor kaei kaba la jia kaba pyni ïa ka ‘The Last Supper’ ha ‘Paris Olympics’. Dei ban burom ïa ki jingsngew niam. Nga pynrem jur ïa kane.”
