Shillong, Naitung 28
Ka Umrynjah Sports Club bad ka Laitkroh Sports Club ki la ïoh rung sha ka quarter-final jong ka Shillong Sports Association’s U-20 Fourth Division 2024 hadien ba ki la jingjop ha ka jingïakhun pre-quarter final kaba la long ha ka Sngi Saitjaiñ ha First Ground, Polo.
Kine baroh ar tylli ki kynhun ki la donkam da ka jingïashut tie-breaker ban pynliem ïa ki club kiba ïakhun pyrshah hadien ba ka jingïakhun ka la kut noh ha ka jingïakhaid.
Haba phai sha ka jingïalehkai, ka Umrynjah SC ka la pynliem noh ïa ka Thynroit Sports Club da 7-6 kol ha ka jingïashut tie-breaker kata hadien ba ka jingïakhun ka la kut noh ha ka jingïakhaid da mar shi kol. Ha ka jingïakhun, ka Umrynjah tang ha ka minit kaba 4, ka la ïoh ïa ka shi kol ba la thep da u Mihsalan Kharjana. Hynrei ha shwa ban wai ka jingïalehkai kaba la buh 70 minit, u Cleofast Kshiar u la ïoh ban pynïakhaid noh ha ka minit kaba 68.
Ha kawei pat ka jingïalehkai, ka Laitkroh SC ka la pynliem noh ïa ka New Challenger Sports Club da 4-2 kol lyngba ka jingïashut tie-breaker hadien ba ka jingïakhun hapdeng kine ar tylli ki club ka la kut noh ha ka jingïakhaid mar 2 kol.
Haba phai sha ka jingïalehkai, dei ka New Challenger kaba la thep kol nyngkong ha ka minit ba 27 lyngba u Lamiki Mukhim, hynrei ka Laitkor pat ha ka kylla miet, ka la ïoh ban khyrwit ar tylli ki kol, kata ha ka minit ba 40 lyngba u Rishailang Myrthong bad minit ba 51 lyngba u Robin Kurkalang hynrei shwa ban put pynwai, ka New Challenger ka la ïoh ban pynïakhaid ha ka minit kaba 70 lyngba u Yesterroi Nongkynrih.
Ka jingïalehkai ha ka sngi Nyngkong pat ka long hapdeng ka lahduh jong ka Group B ka Umiew Maw U Sam Sports Club pyrshah ïa ka Pynthorbah Sports Club kaba dei ka kynhun ba wan ba lai ha ka Group D ka ban long ha ka por 1:30 mynsngi. Katba ka lahduh jong ka Group E ka Nongkolew Sports Club kan ïakhun pyrshah ïa ka Mawlynrei Sports Club kaba long ba lai ha ka Group C ha ka por 4 baje janmiet.
