Shillong, Naitung 28
Ka PV Sindhu kaba la khur ar sien ïa ka takma ha ka lympung Olympic ka la sdang ïa ka jingïakhun ha ka Paris Olympics da ka jingjop pyrshah ïa ka Fathimath Abdul Razzaq na Maldives ha ka women’s singles kaba la long ha ka Sngi U Blei.
Ka PV Sindhu kaba dei ka khlur ïalehkai Badminton ka Ri bad kaba dang khmih lynti ban khur ïa ka takma kaba lai ha ka Olympic, ka la shimpor ïa ka tang 29 minit ban jop ïa ka Fathimath da 21-9 21-6 ha ka jingïakhun jong ka Group M.
“Ka long shisha ka jingsdang kaba biang bha. Nga dap da ka jingkmen. Ka long shisha ka por kaba la slem ban wan phai biang hadien lai snem bad ka long ruh kaba kyrpang bha. Ka Olympic ha u snem 2016 ka long kaba pher bad jong u snem 2020 (2021) ka la kham pher shuh shuh,” la ong ka Sindhu ha ka lynti ïaid ha ka lympung Olympic.
Ka Sindhu kaba don ha ka kyrdan kaba 10, kaba la khur takma rupa ha ka Rio Games ha u snem 2016 bad khur takma rnong ha ka Olympic kaba la long ha Tokyo, mynta kan pynkhreh ban ïakhun pyrshah ïa ka Krintin Kuuba kaba na Estonia kaba bat ïa ka kyrdan kaba 75 ha ka second round ka ban sa long ha ka Sngi Balang.
