Jowai, Naitung 28
Ka Dorbar kyrpang ki Waheh Kur Ka Ri Jaiñtia ka la ai por shi bnai ïa ka Jaiñtia Hills Autonomous District Council (JHADC) ban ithuh noh ïa ki Kur bad Dorbar Kur kiba don ha Ri Jaiñtia katkum ka ‘AD Rule’ pynïaid kam jong ka Autonomous District Council.
Ïa kane ka rai la shim ha ka Dorbar kyrpang jong ki Waheh Kur Ka Ri Jaiñtia kaba la long ha Ïungwalieh ka Dorbar shnong Chilliangraij ha ka 27 tarik Naitung.
Ha kane ka Dorbar la wan shim bynta da ki seng Kur bapher-bapher jong ka Ri Jaiñtia – nalorkata la donlang ruh u Bah Erwin Khnong Sutnga, uwei na ki nongsaid aiñ ka Jylla, ki nongmihkhmat na ki Synjuk ki Rangbah Kur ka thaiñ Ri-Bhoi ba kynthup ïa u Bah P. Syiem, Adivser, Bah R.R. Makdoh, President SRKBH kumjuh na Khasi ba kynthup ïa u Bah R.L. Kharpran, Acting President SRKBH Sengkmie, Shillong, u Bah Aristotle Lyngdoh, General Secretary ka SRKBH Sengkmie, Shillong bad kiwei-kiwei.
Ïa ka jingïalang la pynïaid da u Bah Khroo L. Pariat, President DWK-Ri Jaiñtia uba la ïathuh ïa ka thong jong ka Dorbar, ka jingïathuh khana lyngkot na u Bah G. Bareh, Assistant General Secretary bad ka bynta kaba kut u Bah Pyrkhat Shylla, Vice-President DWK-Ri Jaiñtia u la ai ki kyntien sngewnguh.
Ki nongïalam jong ki seng Kur bapher-bapher ka Ri Jaiñtia kiba la don bynta ha kane ka Dorbar da ka jingsngewkhia ïa ka jinglong kyrpang jong ka jaidbynriew kaba kheiñ jait sha ka Kmie, da kawei ka sur ka la ïeng tylli ban kyrshan bad ban pynbor ïa ka JHADC halor ki mat dawa ba la dep buh ha ïing treikam jong u Deputy Commissioner kumjuh ha JHADC katkum ki kyndon ba la pynkupbor ha ka 6th Scheduled jong ka Riti treikam ka Ri India.
U Bah Erwin K. Sutnga kum u ‘riew shemphang u la batai kyrpang ïa ka 6th Scheduled bad u la kyntu ïa ki khun ka Ri Jaiñtia ba kim dei ban ïalam bakla ïa ka pateng ban wan.
Shuh shuh u la ong kane ka dei ka por kaba la biang bha namar ka Sorkar kaba don ha Delhi ruh ha kine ki sngi ka don jingthmu ban pynbha pynmiat noh ïa ka 6th Scheduled.
Ha kane ka Dorbar Ki Waheh Kur Ri Jaiñtia la pynskhem ruh ïa u Bah G. Bareh kum u General Secretary ba pura bad 2 ngut ki Assistant General Secretary ba kynthup ïa u Bah Jesper Bareh bad u Bah Heimonmi Tyngkan.
