Shillong, Naitung 29
Ka jingbym shimkhia wat hadien ba ka la don ka jingujor ba ka don ka jingthut ha ka bording ilektrik, ka la wanrah ïa ka jingduh ei noh jong kawei ka mynsiem briew kaba la jia ha ka skul Jawahar Navodaya Vidyalaya (JNV), Mawphlang.
Lah ban kdew hangne, ba uwei u khynnah samla ba dang 17 snem, ïa uba la tip kyrteng kum u Nathaniel Sohtun, u la duh ei noh ïa la ka jong ka jingim na ka daw ba la suba ba u la shah lympat ha ka bording ilektrik ha ka Hostel jong ka skul JNV Mawphlang ba peit da ka Sorkar India, kaba la jia ha ka nohphai sngi jong ka 28 tarik mynta u bnai.
Ha ka por 4 duna eiei, ki bor pynïaid skul JNV Mawphlang lem ki khynnah ba sah Hostel lang mar ïa ïoh jingtip ba u Nathaniel u la shah bat ha ka bording ki la leit ban ïarap bad ki la pynkit mar-mar sha Mawphlang CHC hynrei la ong ba u la khlad noh ha lynti.
Katkum ka jingtip kaba la ïoh lum na ki khynnah kiba pule bad ïa sah Hostel lang bad u Nathaniel, ki la ïathuh ba ma ki hi kum ki khynnah ki la dep ban buh jingthoh sha ka Principal shi bnai mynshwa ba kan phah pynbiang ïa ka bording kaba la thut bad wanrah jingma ïa ki.
Kine ki khynnah ki bym shym la kwah ban pynpaw ïa la ka kyrteng, ki la ïathuh ba ki la ïakren bad ki Hostel Warden bad ka la shu don tang ka jingmaramot kaba malu-mala. Ki la ong ba ka bording ilektrik ka par ha ki ar tylli ki Hostel tang shu slap ka bneng bad lada pynmeh pakha ruh ka mih tdem.
Shuh shuh ki la ong ba lada ki pynmeh bording tang na uwei u ‘switch’ baroh kawei ka Hostel ka meh bording lang bad kane ka la wanrah bad pynlong ïa ki ban shu syier mynsiem.
Halor ka jingkhlad noh jong u Nathaniel, ki la ong ba u la leit ban sum khlieh ha katei ka Hostel hynrei ym lah ban tip pat kumno ka bording ilektrik ka la bat ïa u.
Haba ïakren pat bad ka Neelam Sharma kaba dei ka Principal jong katei ka skul, ka bym shym la treh ban kren ha ki kor ring dur da kaba ai daw ba kam don ha ka bor ban kren ne kynthoh eiei halor kane ka jingjia.
Na ka jingïakren bad ka, ka la ong ba ka jingujor ki khynnah ka dei ïa ka jingduh bording ha kitei ar tylli ki Hostel.
Ka la ong ba ka long ka jingjia kaba sniewbok bad na ka liang ki bor pulit ki la wan ban tohkit bad ïit bniah ïa ka jaka ba jia katei ka jingjia.
Shuh shuh ka la ong ba ki bor pynïaid skul ki sah ha ka lyngngoh ïa katei ka jingjia hynrei ki la don bad u Nathaniel haduh ba leit buh ïa u sha Mawphlang CHC bad kynduh ruh ïa ki bahaïing jong u.
