Shillong, Naitung 29
U MP ka Congress na Tura Parliamentary konstitwensi, u Saleng A. Sangma haba ai jingkren hapoh ïingdorbar Parliament ha ka Lah Sngi U Blei u la pynsngew halor ka jingpynrung ïa ka ktien Khasi bad Garo ha ka Khyrnit ba 8 ka Riti Synshar ka Ri, ka Inner Liner Permit (ILP) nalor kiwei-kiwei ki mat ba ïadei bad ka Jylla.
“Haba phai sha Meghalaya, ka Jylla ka la dep ban mynjur ïa ka rai halor ka jingpynrung ïa ka Ktien Khasi bad Garo ha ka Khyrnit ba 8 jong ka Riti Synshar ka Ri khnang ba ngi lah ban pynsngew ïa kine ki ktien ba sngewtynnad hapoh kane ka ïingdorbar,” la ong u Sangma.
U la ong ruh, “Sa kawei, ka ILP…ïa kane ruh la dep mynjur ïa ka rai da ka Ïingdorbar Thawaiñ ka Jylla.”
Haba kdew ba ka thaiñ Shatei Lam Mihngi ka don jingma namar ka jingwan rung be-aiñ kiba nabar, u MP u la ong ba dang ha kine ki khyndiat sngi, da ki spah ngut ki poiwir Rohingya ki la wan rung shapoh India.
“Mynta, ngim don ïa ki khyrdop peitngor kiba biang. Kumta lada don kine, ngi lah ban tehlakam haba phai sha ka jingpeitngor ha ki jaka khappud,” u la ong.
U Sangma u la ong ruh ba ki kam khaïi tuh ki jur bha ha ki jaka khappud bad lyngba kine, ki Rohingya lem bad kiwei-kiwei ki kam be-aiñ kum ka jingkhaïi tuh ïa u drok ka ïai jia na ka por sha ka por.
Haba kyrpad ïa ka Sorkar ban buh ïa ki khyrdop peitngor ha ki jaka khappud, une u nongmihkhmat u la pynsngew ba ka jingkhaïi tuh ha ki khappud ka kynthup kum ïa u kwai, drok, shini nalor kiwei-kiwei.
Haba kren halor ka Mang Tyngka, u MP u la ong ba i kumba ka thaiñ Shatei Lam Mihngi ka la shah kyntait ha ka Mang Tyngka jong ka ‘Irrigation and Flood Mitigation’.
“I kumba ka Sorkar kam shym la ktah ïa ka thaiñ Shatei Lam Mihngi bad kane ka paw shai lyngba ka jinglong-jingman ha Manipur,” u la ong.
U la ong ruh ba ka don ka jingbym biang ha ka sienjam ban pyntikna ïa ka koit ka khiah bad ka jingmanbha jong ki kynthei hapoh ka thaiñ wat la ka Assam ka dei ka Jylla kaba jur tam haba phai sha ka jingïap ki longkmie armet.
“Kumta nga kyntu ïa ka Sorkar ban shimkhia halor kane ka bynta,” u la ong.
Shuh shuh halor ka jingjia ha Manipur, u Sangma u la bynrap ba kam shym la don kano-kano ka jingpyrshang kaba tyngeh ban shimkhia ïa ka jinglong-jingman ha katei ka Jylla.
“Ki lanot ha Manipur kim lah mutdur ban ïohi kaei ban jia bad kumno ka Sorkar kan leh haba ïadei bad ka jingduh kamai jong ki hajar ngut ki nong Manipur naba kane kam ju jia koit ha kiwei-kiwei ki Jylla. Kine ki long ka jingbym larkam jong ka Sorkar bad ka long kaba sngewsih,” u la ong.
“Haba phai sha Meghalaya, ka Jylla ka la dep ban mynjur ïa ka rai halor ka jingpynrung ïa ka Ktien Khasi bad Garo ha ka Khyrnit ba 8 jong ka Riti Synshar ka Ri khnang ba ngi lah ban pynsngew ïa kine ki ktien ba sngewtynnad hapoh kane ka ïingdorbar,” la ong u Sangma haba ïashim bynta ha ka jingïatai halor ka Mang Tyngka.
