Shillong, Naitung 29
Ka khubor kaba la ïohlum na ki pulit ka jylla lyngba ka ‘website’ ha ka Lah Sngi U Blei ka ïathuh ba ki nongshong shnong jong kawei ka shnong kaba don marjan bad u pud u sam ka Bangladesh ha West Garo Hills ki la ïoh bat ïa uwei u nong Bangladesh, bad hadien ba ki pulit ki la peit bniah ïa u, ki la lap ba u don lang kawei ka ‘Aadhaar Card’.
Katkum katei ka khubor, la ong ba ha ka 26 tarik Naitung ki pulit ki la ïoh jingtip ba ki paidbah na ka shnong Piljigre, West Garo Hills, ki la ïohi ïa kumba 6 ne 7 ngut ki suba nong Bangladesh kiba la rung be-aiñ shapoh u pud u sam jong ka India ha ka shnong jong ki.
Hynrei la ong ba ki paidbah ki la ïoh ban bat noh tang ïa uwei napdeng kitei kiba la wan rung be-aiñ. La ong ba uta uba shah bat u dei ba la tip kyrteng kum u Tofijul Ali katba kiwei pat ki la ïohlad ban phet krad.
Kham hadien ynda ki pulit ki la wan sha katei ka jaka, ki la lap ïa san tylli ki ‘Mobile Charger’, uwei u ‘Bluetooth Headphone’, bad kawei ka ‘Aadhaar Card’ ha ka kyrteng jong u Tofajol Sheikh.
Ka shnong Piljigre ka dang hap hapoh Dalu bad ka jngai kumba 59 km eiei na Tura.
