Shillong, Naitung 29
U nongïalehkai siat suloi jong ka ri India, u Arjun Babuta u la duh da ka said na ka bynta ban khur takma hadien ba u la wan ha ka kyrdan basaw ha ka jingïakob siat suloi 10m jong ki shynrang ha ka Paris Olympic ha ka Lah Sngi U Blei.
Haba kheiñ lang u Babuta u la lah ban siat haduh 208.4. Ka 9.5 ka la long ka jubab ïa ka 10.7 ba la khur da u nongsiat suloi ka Croatia u Miran Maricic ka pynïoh jingkyrmen ïa u na ka bynta ban ïoh kiew rynsan. U Babuta ba 25 snem ka rta, u la sdang ïa ka phainal da kaba kamai 10.7 bad bud ïa kata da kaba kamai 10.2. Ha ka jingsiat kaba lai u la ïoh 10.5 kaba la pynlong ïa u ban wan ha ka kyrdan ba saw. Ha ka jingpyrshang basaw u la ïoh 10.4 kaba la pynkiew ïa u sha ka kyrdan ba lai. U la pyndep ïa ka series kaba nyngkong da ka 10.6. U la sdang ïa ka jingïalehkai ba ar da ka 10.7, bud ïa kata da ka 10.5 bad u la siat ïa ka 10.8 kaba jan bha ha ka jingsiat ba ar jong ka jingïalehkai ba nyngkong ka jong u (first elimination series).
Kane ka jingpyrshang ka jong u ka la pynlong ïa u ban wan ha ka kyrdan kaba ar, katba ka pynduna ïa ka jingduna hapdeng jong u bad u nongbat rekod pyrthei uba na China u Sheng Lihao sha ka 0.1 point.
Hynrei u Babuta um shym la lah ban pynneh ïa lade ha kane ka kyrdan bad u la duh ei ban khur takma.
Te kumta u Lihao u la rah ïa ka nam ba ha khlieh duh ha kane ka jingïakob da kaba khur ïa ka rekod ha ka Olympic da kaba kamai 252.2. U Victor Lindgren na Sweden u la khur ïa ka takma rupa da kaba kamai 251.4 bad bud sa u Miran Maricic ka Croatia (230) ha ka kyrdan kaba lai.
