Shillong, Naitung 29
Ki bos kiba ju kamai na Shillong sha kiwei pat ki Jylla bad ki jaka bad kumjuh ki bos kiba wan na kiwei ki Jylla sha Shillong ki dang bteng ban mad jingeh bad kumjuh ruh ki nongleit jingleit da kine ki bos namarba kine ki bos kim lah ban ïaid lyngba ka jingkieng ha dam Umïam wat haba la pyllait pura ban ïaid ki kali na baroh arliang jong ka jingkieng.
Kumba ka long mynta, kine ki bos kiba ju kamai na kylleng ki Jylla ban wan sha Shillong ki la hap ban sangeh noh harud ka pung Umïam namar kim ïohlad shuh ban wan sha Inter State Bus Terminus (ISBT) kaba don ha Mawlai Mawïong.
Kane ka la buh jingeh bha ym tang ïa kine ki bos hynrei khamtam eh ïa ki paidbah kiba leit jingleit da kine ki bos namar ki hap pynlut pisa shuh shuh ban wai kali na Shillong sha Umïam ban leit shong da kine ki bos.
Kumjuh ki briew kiba wan da kine ki bos na kiwei ki Jylla ki mad jingeh namar ki hap ban shim kali da kawei pat na Umïam ban wan sha Shillong bad ki don ki khep ba kim pat ïoh kali lada ki bos ki poi dang step synïa ha Umïam. Shuh shuh ki nongleit jingleit ki hap lut bai kali arsien haba ki leit shong bos na Umïam namar ki hap wai kali na Shillong sha Umïam nalor ka bai bos ban leit sha Tura ne sha kiwei pat ki Jylla ka thaiñ Shatei Lam Mihngi.
Ha ka jingshisha ïa ka jingkieng ha dam Umïam yn pyllait pura naduh ka Sngi Ba-ar ka 30 tarik Naitung, 2024 ïa ki kali ban iaid hynrei yn shah shwa tang ïa ki kali kiba la jingkhia ka long tang hapoh 4 metric ton.
Haba kylli shaphang kane ka jingpyrkhing ïa ki bos kiba ju dei ban wan sha ISBT ha Mawlai Mawïong, u Myntri ka tnat bording, u AT Mondal u la ong ba kane ka jingpyrkhing ka dei na ka bynta ka jingshngaiñ ym tang ïa ka dam hynrei ka jingkieng katkum ka jingai jingmut na ki riewshemphang.
U la ong ba kine ki bos ruh ki dei kiba khia bad hapoh jong kine ki bos ruh la ju thep ïa ki jingkit kiba la nang pynkhia shuh shuh ïa kine ki bos. Kumta u la ong ba ïa mynta, kine ki bos kin nym pat ïaid lyngba ka jingkieng jong ka dam Umïam hynrei yn sa peit pat kham hadien la ka long ne em ban pynjynsur ynda la dep ban pynïeng ïa ki kynja jingker ki ban long ki jingkhanglad ïa ki kali kiba kit palat pud ban ïaid lyngba kane ka jingkieng.
