Shillong, Naitung 29
Ka kynhun jong ka shlem ai jinghikai jong ka Sports Authority of India (SAI) Training Centre, Shillong kan hiar sa sha Nongstoiñ, West Khasi Hills na ka bynta ban leit wan ïa ki khynnah kiba don sap ha ki jingïalehkai bapher-bapher kaba hap hapoh ka Khelo India Rising Talent Identification (KIRTI-MyBharat) Program.
Ka jingthmu jong kane ka prokram ka long ban plie lad ïa ki khynnah don sap ba kypang ha ka jingïalehkai Archery, Athletics bad Football khnang ba kin ïoh ïa lad ban shah hikai hapoh ki shlem ai jinghikai kiba biang pura ïa ki jaka ïalehkai kiba don ha kylleng jong ka ri India, la ong ka kyrwoh ba la pyllait da u Deputy Director ka SAI,STC, Shillong u T.S.Chavhan.
Ïa kane ka prokram yn pynlong ha Sibsing Higher Secondary School kaba don ha Nongstoiñ ha ka 2 bad 3 tarik u Nailar naduh ka por 9.30 mynstep haduh 1 baje mynsngi, katba ka jingbishar bniah kan long haduh 6 janmiet na ka bynta kitei ki ar sngi.
Kane ka prokram kan don ïa ka jingpeit bniah ïa ka met (ki jingthew ïa ka jingkoit jingkhiah) lyngba ki tiar ki tar ka juk stat saian bad ki jingthew ba kyrpang na ka bynta ki jingïalehkai (ki jingthew ba la pynshong nong-rim ha ka jingtbit) ban bishar bniah ïa ka jinglah ha ki nongïalehkai jong baroh ki rta.
