Shillong, Naitung 29
Uwei u samla uba dang 17 snem bad uba pule ha ka skul Jawahar Navodaya Vidyalaya (JNV) Mawphlang u la duh ei noh ïa la ka jong ka jingim na ka jingshah bat bording ilektrik ha ka janmiet jong ka Sngi U Blei.
Une u khynnah u dei ba la tip kyrteng kum u Nathaniel Sohtun bad u dang pule ïa ka klas XI. Kane ka la jia ha ka por ba u dang thmu ban leit sum hapoh ka hostel jong katei ka skul.
Katkum ka tyllong khubor ba la ïoh la ong ba ha ka por 4 baje eiei janmiet jong ka 28 tarik u Naitung, 2024, u Bah K Miza ryngkat bad ka kurim ki la ïoh jingpyntip na ki bor pynïaid skul ka Jawahar Navodaya Vidyalaya (JNV), Mawphlang ba u khun jong ki, u Nathaniel Sohtun uba sah hostel bad pule ha katei ka skul u la ïoh jingshitom bad la pynkit sha Mawphlang CHC.
La ong ba na ka liang ka kmie u kpa kiba na Laban mar-mar ki la leit bran-bran sha katei ka jaka bad ynda la poi shiteng lynti la ïoh jingpyntip ba u khun jong ki u la shitom naba u la shah bat bording ilektrik ha ka por ba u dang leit sum.
Ynda kine shikurim ki la poi ha Mawphlang CHC, ki khlem poi pyrkhat ba kin duh noh ïa la u khun uba dang pule klas XI bad uba dang shu pyndep ïa ka eksam SSLC ha ka 1st Division.
Na ka liang ka kmie bad u kpa jong utei u khynnah ki la ïoh ruh ban ïakren bad ka Principal jong katei ka skul kaba la pyntip ba u Nathaniel u khlad namar ka jingshah bat bording ilektrik. Hynrei na ka liang ki bahaïing kim pat lah satia ban ngeit bad sngew don jingartatien namar ka jingdon ki dak mong ha ki bynta jong ka kti, ka dur bad ka kjat ruh.
Hadien katei, la wanrah noh ïa ka met kaba sah jong u sha ïing ha Laban bad haba la poi ki bahaïing ki la ïakren bad ki pulit ka thanat Laban ban pynïaid shakhmat ïa ka postmortem namar kam shai bha ka jingbatai bad kim lah ngeit ba u Nathaniel un ïap na ka jingshah lympat ha ka bording ilektrik.
Kumta ha ka sngi kaba bud, ka 29 tarik, katba ki bahaïing ki dang ap ban pyndep ïa ka postmortem ha Civil Hospital, Shillong, u Bah K Miza u la ong ba naduh shi bnai mynshwa la don ka jingmudui sha ki bor pynïaid skul ba ka bording kam long kaba shngaiñ hynrei kam don satia ka jingshimkhia lada u khun jong ki u ïap na katei ka daw.
U la ong ba ïa mynta kin ap shwa ïa ka kaiphod jong ka postmortem ha shwa ba kin shim ïa ka sienjam shakhmat na ka bynta ka jingduh noh ïa la u khun.
