Shillong, Naitung 29
Ka Voice of the People Party (VPP) ha ka Lah Sngi U Blei ka la kren shai ba kam don bynta eiei haba ïadei bad ka rai ka ophis u Lamphang ka Ïingdorbar Thawaiñ ka Jylla ban thung ïa u nongïalam ka Liang Pyrshah.
“Na ka liang ka VPP, nga kwah ban pynpaw ba ka seng ka sngew ktah shi kat dei halor ki jingmih khubor ba khah-khah, ha kaba ka kyrteng ka seng ka la mih (khlem ka jingdonkam) haba ïadei bad ka jingthung ïa u nongïalam ka liang pyrshah,” la ong u Secretary ka Parliamentary Party ka VPP bad MLA ka Mawryngkneng, Bah Heavingstone Kharpran ha ka shithi ba la phah sha u Lamphang ka Ïingdorbar Thawaiñ ka Jylla, u Thomas Sangma.
“Kumta, nga kwah ban kren shai ba ka seng kam don bynta eiei haba ïadei bad ka rai ka ophis jong phi ban thung ïa u nongïalam ka liang pyrshah,” u la ong.
Ha kajuh ka por, u la pynshai ba ym dei satia ban shim ïa ka jingkyrshan u President ka seng, Bah Ardent M. Basaïawmoit ïa u Saleng A. Sangma na bynta ka kam ‘Chief Whip’ (ka liang pyrshah) kum ka jingïadon bynta lang haba phai sha ka jingthung ïa u nongïalam ka liang pyrshah.
“Ïa kane la leh shimet katkum ka jingkyrpad jong u Saleng A. Sangma halor kane kajuh ka bynta,” la ong u Bah Kharpran.
