Shillong, Naitung 29
Ka HITO Student’s Wing ha ka 29 tarik u Naitung ka la leit ban ïakynduh bad aiti da ka dorkhas ha ka Director jong ka Directorate of Educational Research and Training (DERT), ka Kong R.S Manners, MCS, ban pan jingpynshai halor ka jingpynslem ban ai ïa ka bai bam ne ka ‘scholarship’ jong ki khynnah pule D.El.Ed jong u snem 2023-2024.
Kane ka jingleit ai dorkhas jong ka HITO Student’s Wing ka dei hadien ba na ka liang ka tnad ka la pynmih jingpynbna ba ka bai bam kaba dei ban leit sha 2 Year Pre-Service Student Teacher jong ka D.El.Ed. Course kiba don ha ki District Institute of Education & Training (DIETs) bad ha Cherra Teachers Training Centre Sohra (CTTC) jong ka samoi pule 2023-2025 na ka bynta ki samla pule baroh ar snem kata kiba 1 snem bad 2 snem yn nym pyllait satia namar ka jingduna pisa jong ka sorkar bad ïa ka jingtyrwa la pynkynriah lyngba ka Supplementary Demand for Grants bad ka Supplementary Appropriation jong u snem 2023-2024.
Halor kane ka bynta na ka liang ka seng ka la pynpaw ïa ka jingsngewkhia kaba jur tam bad ha katei ka dorkhas ba ka seng ka la aiti, ka la buh jingkylli ïa ka Director ba kiei ki lad ki lynti ba la shim da ka tnad ba dei peit ban ïaleh pyrshah ïa kine ki jingjia? Hato don ne em kano-kano ka jingkular ba yn ai ne pyllait ïa ka bai bam jong ki samla pule? Kaei ka daw jong ka jingduna pisa bad na ka liang ka seng ka la pan ruh ïa ka kopi jong ka jingdawa ba pyndap ïa ki jingai jingïarap ne ka ‘Supplementary Demand for Grants’ bad ka jingpynlut pisa ne ka ‘Supplementary Appropriation’ na ka bynta u snem 2023-24.
Na ka liang u samla Ïajanlang Sohtun, Chairman HITO Student’s Wing u la ong ba na ka liang ka tnad ka la ai ïa ka jingpynshai ba ki lah shimkhia katba lah ban pynbor ïa ka sorkar ba ka dei ban pyllait noh mardor ïa ka bai bam jong ki samla pule.
U samla Ïajanlang Sohtun u la ong ba la ïohi na ka por sha ka por ki don shibun ki jingdkoh treikam kiba mih ha kaba ïadei bad ka tnad pule puthi naduh ka bai bam ki khynnah pule kiba leit klas haduh ki khynnah kiba leit ban pule ïa ka D.El.Ed.
Shuh shuh na ka liang ka seng ka la dawa na ka sorkar ba ka dei ban ïaleh katba lah ban pynbiang ïa ka bhah mang tyngka na ka bynta ki khynnah pule khnang ba kum kine ki jingjia kin nym jia shuh nangne shakhmat.
“Na ka liang jong ngi, ngi buh ka jingkyrpad sha ka sorkar ba kan ïaleh katba lah ban pynbiang ïa ka bhah mang tyngka na ka bynta ki khynnah pule khnang ba kum kine ki jingjia kin nym jia shuh nangne shakhmat bad ngi kyrpad jur ruh ba na ka liang ka sorkar ka dei ban shimkhia ïoh lehse ka don ka jingïatan tyllai hapdeng ka sorkar ka tnad pule puthi ha kaba ïadei bad kine ki mang tyngka na ka bynta ki samla pule”, la ong u samla Ïajanlang.
