Shillong, Naitung 29
Ka Umïew Maw U Sam bad ka Nongkolew SC ki la lah ban pynthikna ban jam sha ka quarter final ha ka lympung ïalehkai Under-20 Fourth Division 2024 ba la pynïaid da ka Shillong Sports Association ha ka lah sngi U Blei.
Ha ka jingïakhun pre- quarter final kaba la long ha SSA Stadium kaba ha Polo, ka Umiew Maw U Sam ka la pynjem khnap haduh shiteng dorjon (6-0 kol) ïa ka Pynthorbah SC. U Eric Nongrum u la ïoh hat-trick da kaba thep lai kol ha ka minit kaba 22, 34 & 50. Katba ïa kiwei pat la pynbud da u Eller C Allya (32), Emanuel Rongrin (65) bad u Banteishaphrang Lymba (70+1).
Haba phai sha kawei pat ka jingïakhun, ka Nongkolew SC ka la pynliem noh ïa ka Mawlynrei SC lyngba ka shi kol ba la thep da u Pynshngaiñ Majai ha ka minit kaba 32.
Ka jingiakhun pre- quarter final kan bteng biang ha ka sngi Ba-ar ha kaba ka Nongthymmai SC Raijnongkynrih kan ïakhun ïa ka Them Rangshken ACC ha ka por 1:30 mynsngi, katba ka Mawphlang SC pyrshah ïa ka Madanryting SC ha ka por 4 baje janmiet.
