Shillong, Naitung 29
Ka Hynñiewtrep Taxi Tourists Association (HTTA) ryngkat ka kynhun ki nongñiah kali Tourist na ka jylla Assam ki la ïakynduh lang ha ka Lah Sngi U Blei ha nongbah Shillong ban ïathir bad ïatai sani halor kaei kaba la dep jia ha kine ki khyndiat sngi bad rai ruh ba kin sa pynlong ïa ka jingïalang ha Nong-poh, Ribhoi District ban ïa pyrkhat halor ka jingshah pyndik shaba palat ki kali kamai Tourist na ka jylla Assam kiba wan kamai sha Meghalaya bad na ka jylla Meghalaya kiba kamai sha ka jylla Assam.
Lah ban pynkynmaw ba ka jingshah bat naphang jong ki kali kamai Tourist na ka jylla Assam dang shen ha Umtyngar ha ki dkhot ka Hynñiewtrep National Youth Front (HNYF) East Khasi Hills District ka la pynlong ruh ïa ki kali kamai Tourist na ka jylla Meghalaya ba kin mad ïa kajuh ka jingshah pyndik haba ki leit buh ïa ki nongleit jingleit sha ka jylla Assam.
Haba kren sha ki lad pathai khubor hadien ba la wai ka jingïalang jong ka Joint Action Committee (JAC), u Working President jong ka HTTA u Bah Tiplang Nongbet u la ong ba ka seng jong ki nongñiah kali kamai Tourist ki la pynpaw ïa ka jingsngewsih halor kine ki jingjia bad ki la kyrpad ruh ïa ki nongñiah kali kamai tourist na ka jylla Assam ba kim dei ban tieng namarba ka seng kan sa pynthikna ba kan ym don ka jingshah pyndik jong ki nongleit nongwan bad ki nongjngohkai pyrthei kiba wan sha ka jylla Meghalaya.
U Bah Nongbet u la ong, ka seng ki nongñiah kali kamai Tourist na ka jylla Assam ruh ki la khot ïakren ïa ka seng halor kine ki kynrum-kynram ïa kaba kin sa ïakren pynbeit ïa kine ki jingeh ha ka sngi Baar.
“Ngi kyrpad ïa ki nongñiah kali kamai Tourist kiba na ka jylla Meghalaya ba kin ïeng ha ki jaka ba la kdew da ka Sorkar. Ngin ym shah shuh ïa ki kali kamai Tourist ba kin shim kabu da kaba shu kamai da kaba kit ïa ki nongleit jingleit na surok khlem ïeng ha ki jaka ba la buh bad ngin sa phah ruh da ka shithi sha u Superintendent of Police,” u la ong.
“Ka jingmih ki kynrum-kynram baroh ka dei na ka jingbun shaba palat ki kali kamai Tourist kiba shu kamai kat naba lap ha surok bad ki bym ïatreilang satia bad ka Association, bad ngi kyrpad ruh ïa ki nongñiah kali ba kin ïeng beit ha ki jaka ba la pynbeit da ka Association,” u la bynrap.
