Shillong, Naitung 29
Ka kynhun ïalehkai kriket ka India kaba don ïa ki khlur ïalehkai ba kynsai kum u kapten u Rohit Sharma bad u Virat Kohli, ka la sdang ïa ka jingkilanmet ha ka Lah Sngi U Blei na ka bynta ka jingïakhun ODI series ka ban long lai tylli pyrshah ïa ka Sri Lanka naduh ka 2 tarik u Nailar.
Katba ka kynhun ïalehkai T20I jong ka India kaba la ïalam da u Suryakumar Yadav kan ïakhun ïa ka T20I kaba khatduh ha ka sngi Thohdieng ha Pallekele, u Rohit, u Kohli, bad kiwei kiwei, kynthup ïa u rangïalehkai ba thymmai u Harshit Rana, ki la thmu ban kilanmet ha Colombo hadien ba ki la poi ha ka Sngi U Blei.
U Rohit, u Virat bad u Kuldeep Yadav ki wanphai biang sha ka jingïa-lehkai la jan shibnai hadien ba ki la ïadon ha ka jingjop jong ka India ha ka T20 World Cup kaba la long ha America, kaba dei ka jingjop kaba ar jong ka India ha kane ka lympung.
Ha kane ka jingïakhun ODI pyrshah ïa ka Sri Lanka yn ïohi ruh ïa ka jingwanphai biang jong u Shreyas Iyer sha ka kynhun ïalehkai ka ri.
Uwei pat ubala pynïasoh ïalade bad kane ka kynhun u dei u rangïalehkai (all-rounder ka Delhi) u Harshit Rana, uba la don lang ha ka kynhun ïalehkai jong ka Kolkata Knight Riders kaba la jop ïa ka IPL ha kaba sdang jong une u snem.
Kine ki rangïalehkai kin pyntbit hapoh ka jingpeit jong u assistant coach ka India u Abhishek Nayar ha Colombo. Kitei ki lai tylli ki ODI kin long ha R. Premadasa Stadium ha Colombo. Ka jingïakhun kaba nyngkong la buh ban long ha ka 2 tarik Nailar, ha kaba ka jingïakhun kaba ar bad kaba lai la buh ban long ha ka 4 bad 7 tarik.
