Shillong, Naitung 29
Ka Khasi Students’ Union Mawprem Circle ha ka 27 tarik u Naitung ka la pyn-tian smai ïa ki nongkitkam bathymmai ka seng na ka bynta ka samoi treikam 2024-2027 ba la pynlong ha ka Community Hall jong ka Dorbar Shnong, Lumkshaid.
Ha katei ka sngi la pyntian smai ïa ki nong-kitkam ka seng da u Bah Lambokstarwell Marngar uba dei u President ka KSU sengkmie ha ryngkat ka jingïadon lang ki nong-ïalam ba hakhmat ka KSU sengkmie kiba kynthup ïa u Samla Raymond Khar-jana uba dei u Organising Secretary, KSU Sengkmie, u Samla Eddie Malngiang, Asst. Organising Secretary, KSU Sengkmie, u samla Sam Kharshandi, General Secretary, KSU Mawkhar Circle, u Samla Reginald Thabah President FKJGP, Mawprem Circle, ki nongïalam barim jong ka KSU Mawprem Circle bad ki dkhot jong ki jylli bapher-bapher.
Ki nongïalam kiba la shah pyntian smai ha katei ka sngi ki kynthup ïa u samla Badonkupar Nongbri kum u Presi-dent, u samla Samuel Shabong kum u General Secretary bad u Samla Pynshngaiñ L. Lyngkhoi kum u Vice President ha ryngkat kiwei pat ki dkhot bad nongïalam.
Haba ai jingkren ha katei ka jingïalang, na ka liang u Bah Lambokstarwell Marngar u la ong ba ki don shibun bah ki kamram bad ka kyrdan kum u nongïalam ka snoh ryngkat bad ka jingsngewrit, ka jingtip briew, ka jingkhuid-jingsuba, ka jingsngur bad kaba kongsan napdeng kita ka long ban snoh ïa ka mynsiem len lade bad ka mynsiem kheiñ duh.
U Bah Lambokstarwell u la ai mynsiem ïa kitei ki samla ba kum ki samla ki dei ban long kiba stad, kiba shemphang bad kiba sngewthuh haba ki ïaid bad pyntyllun ïa ki kam khnang ba kin ïoh ïa ka jylli kaba khlaiñ ba kin lah pat ban kit ban bah ïa ka lyngkor jong ka jaitbynriew ha ki liang baroh.
Shuh shuh u Bah Lambokstarwell u la ong ba lada don ki nongïaroh wat sngewsarong bad lada don kiba beiñ wat sngewrem hynrei dei ban pynjanai ïalade. U la ong ruh ba nangne shakhmat ka seng kan dang ïai bteng ban khynra ïa ki nongwan buhai shnong beaiñ ha kylleng ka Bri u Hynñiewtrep.
“Wat nym sngap ïa ki jingwit-jingwoh bad ki jingshah kynthoh hynrei pyrshang ban pyntikna ba ka jaitbynriew kam dei ban shah tan pat ha ka kti jongno-re-jongno ba kin nguid pat ïa ki riti ki dustur hynrei ngin pyntikna ba ngin pynim ïa ka Ri bad ka Jaitbynriew baroh kawei”, la ong u Bah Lambokstarwell.
