Shillong, Naitung 29
Ka kynhun ïalehkai phutbol ka Jylla ka la mad ïa ka jingshah rem kaba nyngkong eh ha ka Junior Boys National Football Championship (Tier 1) 2024 na ka bynta ka BC Roy Trophy, hadien ba ka la shah pynliem noh ha ka Chandigarh da 1-0 kol ha ka 28 tarik.
Kane ka la wan urlong lyngba ka shi kol ba la thep da u Hipjyoti Moran na ka bynta ban pynlong ïa ka Chandi-garh ban ïoh lai point ba nyngkong jong ka Group-C ha Narainpur, Chhattisgarh.
Kane ka kynhun hapoh ka jingïalam u Bah Lekini Suting kum u coach ka la shah kynthup lang ryngkat kiwei pat ki kynhun kum ka Punjab bad ka Karnataka.
Ha katei kajuh hi ka sngi ka Punjab ka la lah ban pynliem ïa ka Karnataka da 3-1 kol na ka bynta ban ïoh ïa ki lai point.
Kumta ka Meghalaya kan pynkhreh ban ïakhun pyrshah ïa ka Punjab ha ka 30 tarik mynta u bnai.
