Shillong, Naitung 29 (UNI)
U MP barim ka Mysuru bad u Myntri barim ka sorkar Karnataka, u Chandrashekhar H. Vijayashankar, un bam smai kum u Lat ka jylla Meghalaya ha ka Sngi Ba-Ar.
Ïa u Vijayashankar yn pynbam smai da u Chief Justice ka Meghalaya High Court, u Justice S. Vaidyanathan ha ka por 4:30 janmiet ha Raj Bhavan. U Vijayashankar u la shah thung ha ka President Droupadi Murmu ha ka jaka jong u Lat ba mynta, u Phagu Chauhan.
U Chauhan u la shimti kum u Lat ka jylla naduh ka 18 tarik Rymphang, 2023, bad hashwa kata, u la long kum u Lat ka jylla Bihar naduh u snem 2019.
Lah ban kdew ba u Vijayashankar, ha u snem 1994, u la shah jied ha ka sien banyngkong kum u MLA ha ka jylla Karnataka. Ha u snem 1998, u la shah jied kum u MP ka Lok Sabha na Mysore bad u la jop biang ha u snem 2004.
