Shillong, Naitung 29
Ka High Power Committee ka la rai ban pyllait pura noh ïa ki kali ban ïaid baroh arliang lyngba ka jingkieng dam Umïam hynrei ka jingkhia ki kali kiba ïaid ka dei ban long tang hapoh 4 metric ton.
Ïa kane ka rai la shim ha ka jingïalang jong ka High Power Committee kaba la pynïaid da u Symbud Myntri u Bah Prestone Tynsong ha ka jingïadonlang u Myntri ka tnat Bording, u AT Mondal kaba la long ha Secretariat ha ka Lah Sngi U Blei.
U Chief Secretary Bah D.P Wahlang, Director General of Police, Kong Idashisha Nongrang, u Commissioner & Secretary ka tnat Bording u Sanjay Goyal, uba dei ruh u Chairman-cum-Managing Director jong ka Meghalaya Energy Corporation Limited (MeECL), nalor ki bor district bad ki ophisar ka na ki tnat bapher bapher ka Sorkar Jylla bad ki briew ka kompani ITD Cementation nangta u Associate Professor ka IIT Guwahati, Dr Ronambabu Oinam.
Haba pynbna ïa kane ka rai lyngba ki lad pathai khubor, u Mondal u la ong ba ïa ki kali kiba wan mar pyrshah na baroh arliang jong ka jingkieng ha dam Umïam yn pyllait pura noh tangba yn shah shwa tang ïa ki kali kiba don ka jingkhia hapoh 4 metric ton bad hadien katto-katne por yn peit thuh biang ban pynjynsur bad ban shah ïa ki kali kiba kit ïa ki jingkit ba kham khia wat haduh 12 metric ton.
U Mondal u la ong ba ka jingpynlut ka long kumba T.19 klur bad na kane, kumba T.64 lak ka dei na ka bynta ka jingmaramot ïa ka jingkieng bad kham bun ka dei ka jingmaramot ïa ka dam.
U Mondal u la ong ba ka don ruh sa kumba T.2 klur ban pynbha bad pynbit-pynbiang ïa kiwei pat ki jingdonkam kiba dang dei na ka bynta ka jingkieng.
Khnang ban khanglad ïoh don ki kali kiba kit palat pud kiba ïaid lyngba ka jingkieng, la rai ban pynïeng ar tylli ki kynja jingker na baroh arliang da ka PWD. Kane ka jingleh ka long na ka bynta ka jingshngaiñ jong kane ka jingtei bad ban lait na ka jingshah kyrñiom palat ha ki kali kiba ïaid lyngba kane ka jingkieng.
