Shillong, Naitung 29
Ka jinglah ban pynphai kol u Harmanpreet Singh ka la biang pura ïa ka India ban ïakhaid mar 1-1 kol pyrshah ïa ka Argentina ha ka jingïalehkai hockey (Pool-B) jong ka Paris Olympics 2024 ha ka Lah Sngi U Blei.
Kane ka la wan urlong ha ka minit kaba 58 ha shwa ba u kapten jong ka India un thep kol lyngba ka penalty corner. U Lucas Martinez u la thep ïa ka kol kaba nyngkong na ka bynta ka Argentina ha ka minit kaba 22.
Ha ka jingïalehkai kaba nyngkong, ka India ka la lah ban pynliem ïa ka New Zealand da 3-2. Hynrei ha kane jingïakhun ba-ar pyrshah ïa ka Argentina ka la shem jingeh ban kynjoh sha ka thong.
Kumta kane kynhun ïalehkai jong ka India ka dang don ha ka kyrdan ba lai napdeng 6 tylli ki kynhun kiba la don ha ka Pool-B da kaba kamai saw poiñ na ar tylli ki jingïakhun. Ka Belgium bad ka Australia ki don ha ka kyrdan ba nyng-kong bad ar, katba ka Argentina ka don ha ka kyrdan ba saw. Ka India kan dangdonkam ban ïakhun tyngeh na ka bynta ban ïoh rung hapoh ka thup ba saw jong kane ka Pool-B khnang ban ïoh rung sha ka quarter-final.
