Shillong, Naitung 29
U MP ka Voice of the People Party (VPP), Dr. Ricky A.J. Syngkon u la thoh sha u Vice-Chance-llor (VC) ka North Eastern Hill University (NEHU), Prof. P.S. Shukla halor ki jinglong-jingman ba ïadei bad ka skulbah.
“Nga thoh ïa kane ka shithi ban pynsngew sha phi halor ki jingsngew-khia haba ïadei bad ki jinglong-jingman hapoh NEHU,” la ong u Dr. Syngkon.
U la kdew ba ïa ka skulbah la pynïeng da kaba buh jingmut ïa ki jingkyrmen bad jingangnud jong ki jaidbynriew trai-ri – ha kaba sdang jong ka thaiñ Shatei Lam Mihngi baroh kawei bad mynta na bynta ka bha ka miat jong ka Jylla naba kiwei ki Jylla ki la don la ki jong ki skulbah jong ka Sorkar Pdeng.
“Hynrei ka long kaba sngewsih ba ki bor pynïaid ka skulbah ki pyrshang ban kyntait ïa kane ka bynta ba kongsan kumba ka paw shai ha ka jingthung kam ba dang shen haba ïadei bad ki kyrdan nonghikai bapher-bapher ha kaba ïa ki kyrtong trai-ri kiba la bit la biang kim shym la shah thung,” u la ong.
Haba ïadei bad katei ka bynta, u MP u la kyntu ïa u VC ban pyntikna ba ka jingthung kam kaba dang ïaid mynta na bynta ki nongtrei (ki bym hikai) dei ban leh hi da ka skulbah khlem da phai khmat sha ka rukom thung kam ka Sorkar Pdeng kumba la leh da katto-katne ki shlem pule ka Sorkar Pdeng hapoh ka Jylla.
“Dei ban bud ryntih ïa ka bhah thung kam na bynta ki trai-ri jong ka Jylla,” u la ong.
Ha kajuh ka por, u la kyrpad ïa VC ban pyntikna ba ki bor pynïaid ka skulbah ki dei ban treikam beit thik katkum ki Statue/Ordinance/Regulation/Convention kiba ïadei bad ka rukom synshar ka skulbah.
“Ym don mano-mano ruh uba long halor jong ka skulbah bad kum u khlieh jong ka shlem pule, ka dei ka kamram jong phi ban peit ba ka kyndon aiñ ka ïeng rasong,” la ong u Dr. Syngkon.
Shuh shuh utei u nongmihkhmat u la bynrap ba u la ïoh jingtip ba kiba bun ki samla trai-ri na ki bynta bapher-bapher ki la kynjoh sha ka skulbah ban shim wai ïa ki dukan kiba don hapoh ki sawdong-sawkun (jong ka skulbah), hynrei ki bor pynïaid kim shym la shimkhia ïa kane ka mat kumba ka long haduh mynta.
“Kumta, nga khmih lynti ba phin shimkhia ïa ki jingkdew kiba la pynsngew haneng da ka jingkitkhlieh,” la ong u MP.
