Hashwa bad hadien ka ilekshon MP Lok Sabha 2024, ka jingphaikhmat sha u nongïalam ka Congress, u Rahul Gandhi, ka la nang kiew. Ka BJP, hashwa ka ilekshon, ka la kob ba kan ïoh palat 400 ngut ki MP, hynrei ynda la ñiew ‘vote’, ka la ïoh 240 ngut ki MP. Watla ka la lah ban thaw sorkar da ka jingïarap jong ki seng kiba don lang ha ka shatri jong ka National Democratic Alliance (NDA), hynrei ka la nang aibor pat ïa ka liang pyrshah lane ka INDIA Bloc. Ka jingshah thung jong u Rahul kum u Nongïalam ka Liang Pyrshah ha Lok Sabha ka la nang pynkhlaiñ ïa ka sur jong ka INDIA Bloc hapoh bad shabar jong ka Parliament.
Ka juk ba ngi im, ka dei shisha ka juk jingkylla namar mynshwa, ngi kynmaw ba u Rahul u la shah beiñ shah khoh bad shah tar snieh ha ban da biang na baroh ki liang. U la shah sin la bun jait. Ki paidbah, hashwa jong u snem 2014, ki la phai khmat sha u Narendra Modi uba ha kato ka por u dang dei u Myntri Rangbah ka Gujarat. U Modi u la long kum uta u nongïalam uba ki paidbah ki I don jingkyrmen hadien ba ka sorkar United Progressive Alliance (UPA) ba la ïalam da ka Congress ka la ngat ha ki jingshah kynnoh bamsap bamngem kiba bun jait. Namarkata, ha ka ilekshon ha u snem 2014, ki paidbah ki la pynjop kput ïa ka BJP ki la pynliem ha ban da jem jai ïa ka Congress hapoh ka jingïalam jong u Rahul. San snem hadien, ka la long kumjuh, bad ki seng kiba pyrshah ïa ka BJP ki khlem don jaka satia. Hynrei ha u snem 2024, watla ki khlem ai bun ngut ki MP ban lah ban thaw sorkar, ki paidbah ki la pynkhlaiñ ïa ka liang pyrshah namar ki sngewthuh ba ka Ri kan don hapdeng ka jingsyier lada ailad than tang ïa uwei u briew ne kawei ka seng ban synshar katba ki sngewbit.
Kane ka pyni ba ki paidbah ki la sngewthuh ïa ka jingsynshar ba 10 snem jong u Modi bad ka jingtlot jong ka liang pyrshah haduh bym long shuh ban ïakren. Ki la sngewthuh ba lada khlaiñ palat ka sorkar, ma ki hi (paidbah) ki don hapdeng ka jingsyier. Ki la sngewthuh ba ym tang ba ka Ri ka donkam ïa ka sorkar kaba skhem, hynrei ka donkam ruh ïa ka liang pyrshah kaba khlaiñ. Naduh ba sdang ka Dorbar jong ka Lok Sabha kaba 18, ngi la ïohi shisha ïa ka jingkhlaiñ jong ka liang pyrshah khamtam ban ïa kawang nia bad ka liang synshar. Ki jingkren, jingwoh nia, bad jingshlur jong u Rahul ban ïeng pyrshah ïa ka liang synshar ka la ai mynsiem ïa kiwei pat ki bym ïahap jingmut bad kane ka sorkar. Teng-teng ka por ka dawa ïa ngi ban ïa kyrshan tylli ïa ka sorkar bad teng-teng ïa ka liang pyrshah. Bad kane ka shong halor ki mat ki jura. Ym dei ban shu kyrshan ne pyrshah khlem nongrim.
Ha ka jingsynshar paidbah, ngim donkam ban da ïahap jingmut bad ka sorkar. Ngi don ka mon ba laitluid ban pyrshah ïa ka ha ki rukom bapher-bapher. Ka long ruh kaba donkam ban ai ka jingkyrshan ïa ka liang pyrshah ha ki mat kiba bun khnang ba ngin lait na ka jingshah ñion ha kito kiba don ha ka bor. Lada baroh ngi shu ïa kyrshan sorkar lut, kaei ka ban jia? Kato ka sorkar kan sa sngewheh sngewmeng bad kan synshar katba ka sngewbit khlem da kheiñ shuh ïa ki paidbah kiba la pynjop. Ha kaba kut, ki nongshong shnong kin saja. Ki paidbah ki ngiah lada ïakren than tang shaphang ka niam ne ka jingngeit lane ka jingpynïashrut hapdeng ki nongshong shnong lane ka jingbym pynleit jingmut ha ki mat bakongsan kum ka jingai kam ai jam bad ka jingpynduna ïa ka dor ka mur jong ki mar ki mata ba donkam. Ki paidbah ki kwah ba ka sorkar kan thaw lad ban ai kam ai jam ïa ki bad ym ban lapmiet ban pynïashrut ha ka kyrteng jong ka niam/jingngeit. U don u pud ïa kiei-kiei baroh, bad namarkata, ka jubab jong ki paidbah ha ka ilekshon MP kaba dang shu dep, ka long kum ka jingsneng na ka bynta ka BJP bad ïa baroh kiba pynbunkam ïa ki nongshong shnong ha ki kam ïashrut bad ïakynad.
Ngi sngewïoh mynsiem haba ïohi ba ki MP ka liang pyrshah ki pyndep ïa la ka jong ka kamram. Ngi kyrmen ba kin ym pyndem ne ïapeiñ bad ka sorkar. Lada ki leh pat kumta, ki paidbah kin sa pynkut syndon ïa ki ha ka ilekshon ka ban wan. San snem ka dei kaba jrong bha ha ka saiñpyrthei. Hynrei tang hapoh shi khyllipmat, ka jingangnud ban don ka sorkar ka lah ban kylla lada ki paidbah ki sngewthuh ba kito ki seng ne ki nongïalam ki shu lapmiet tang ban pynthame halor ki mat ki jura ki bym don jingmut bad ki bym ai jingmyntoi ïa ki bad ïa ka Ri. Hynrei, ka liang pyrshah ka dang hap ban shut shuh ïa la ki jong ki reng khnang ban kham itynnad ka jingïakhun bad ka sorkar, bad kan dei ka kamram jong ki seng saiñpyrthei ki bym don bad ka BJP ba kin rah ïa ka sur jong ki paidbah bad ban ïaleh na ka bynta jong ki. Ka liang pyrshah ka dei ban long ka sur jong ki bym don sur, ka bor jong kiba tlot, ka jingkyrmen jong kiba im hapdeng ka jingdum, bad ka kynhun ka ban khmih ba ka sorkar ka synshar katkum ki aiñ.
