Jowai, Naitung 30
Ka Delimitation Committee jong ka Jaiñtia Hills Autonomous District Council (JHADC) ha ka 30 tarik Naitung ka la aiti ïa ka kaiphod kaba pura sha u Chief Executive Member (CEM) ka JHADC Bah Thombor Shiwat halor ka jingpynbeit thymmai ïa ki MDC Constituency ka council.
Kane ka committee kaba la thung naduh 20 tarik Naiwieng, 2023 kaba khlieh da u Dr. Dakyntuhimi Lyngdoh, Asst. Professor kum u Chairman ka la pyndep ïa ka jingpynsngew paidbah ha baroh ar tylli ki District (East Jaiñtia Hills District bad West Jaiñtia Hills District) na ka bynta ban pynbeit thymmai ïa ki shnong kiba hap ha 29 tylli ki MDC Constituency jong ka JHADC.
Kum ban shu pynkynmaw, ïa ka draft jong ka delimitation of JHADC Constituencies draft la pyllait paidbah da ka committee ha ka 4 tarik Naitung bad ka la dep ruh ban pynlong ïa ka jingpynsngew paidbah ha Amlarem, Jowai bad Khliehriat.
Ha kane jingpynsngew paidbah kiba bun na ki shnong ki la pynpaw ïa ka jingpyrshah kaba jur halor ka jingpynbeit thymmai ïa ki Constituency MDC.
Na ka liang u CEM Bah Thombor Shiwat, u la pyntip ba kin shong jingïalang executive committee shuwa bad hadien yn rah hapoh ka dorbar ban ïoh ïa ka jingmynjur halor ka jingpynbeit thymmai ïa ki constituency, ïa ka tarik kaba thikna ym pat lah ban pynbna.
Dei namar kane ka jingphiah Constituency, ka sorkar ka la rai ruh ban pynjlan ïa ka samoi treikam jong ar tylli ki council (ka JHADC bad ka KHADC) kata hadien ba ka samoi jong ki ka la kut naduh ka 5 tarik Lber 2024.
