Shillong, Naitung 30
Ka Meghalaya ka la duh noh ïa ka lad ban jam sha ka semi final ha ka lympung ïalehkai Junior Boys National Football Championship (Tier 1) 2024 na ka bynta ka BC Roy Trophy, hadien ba ka la mad biang ïa ka jingshah rem sa ha ka Punjab da 2-1 ha ka Sngi Ba-ar ha Narainpur, Chhattisgarh.
Kumba ka paw tang kawei ka kynhun na saw tylli ki group ki ban ïoh rung sha ka semi final, hynrei ka Meghalaya kaba don ha ka Group-D ka la mad ïa ka jingshah rem ar sien kata ha ka Chandigarh ha ka jingïalehkai kaba nyngkong kaba la long ha ka ka Sngi U Blei.
Ha kane ka jingïakhun kaba ar baroh ar ki kynhun ki la ïakhun tyngeh naduh kaba sdang ha kaba ka Punjab ka la ïoh ban pynkhih jar nyngkong eh lyngba u Jugraj Singh ha ka minit kaba 12. Kane ka kynhun ka la pynbud biang ïa ka kol kaba ar ha ka kylla miet lyngba u Daljinder Singh ha ka minit kaba 56. Hynrei shwa ban wai ka Meghalaya ka la lah ban pynphai kylla shi kol lyngba u Iminstar Mawlong (78) hashwa ba kan mad ïa ka jingshah rem ha kane ka lympung.
Kane ka kynhun ka Jylla hapoh ka jingïalam u Bah Lekini Suting kan pynkhreh ïa ka jingïakhun kaba lai pyrshah ia ka Karnataka ha ka sngi Palei.
Ha kawei pat ka liang, ka Chandigarh ka la lah ban pynliem ïa ka Karnataka da 2-0 kol na ka bynta ban bteng ïa ka jingjop ba ar. Kumta ka Chandigarh ka la ïaryngkat mar 6 point bad ka Punjab, kaba la jop ïa ka Karnataka ha ki ar sngi ba la lah. Ka jingïaknieh ban ïoh rung sha ka semi final kan long hapdeng ka Chandigarh bad ka Punjab, ki ban ïakhun ha ka Sngi Palei.
