Shillong, Naitung 30
Namar ka jingleh mynthi bad ka jingleh kuman jong ka sorkar jylla ban sngap ïa ka jingdawa ban kyntiew kyrdan noh ïa ka Mawsynram C&RD Block sha ka Civil Sub Division, ka KSU Sawsymper Circle, Balat Border Area Circle bad ka Lawbah Border Area Circle kiba dei ki shnat treikam jong ka KSU South West Khasi Hills District, ki la shim ïa ka rai ban pynlong noh da ka jingïakhih shong kyllaiñ-myngor ha ka 10 tarik u Nailar 2024 ha ka por 11 baje mynstep ha Mawsynram.
Haba kren sha ki lad pathai khubor ha ka 30 tarik u Naitung, u Bah Jiedskhem Nongsiej, General Secretary ka KSU South West Khasi Hills District, u la ong khnang ba kane ka jingdawa jong ki kan urlong noh mynta ha kane ka kynti, ka seng kan sa pynlong da katei ka jingshong kyllaiñ myngor bad kyrpad ruh ïa baroh ki nongshong ka thaiñ ba kin wan shakhmat ban ïasnohkti lang ban dawa ïa katei ka jingdonkam jong ka thaiñ baroh kawei.
U Bah Nongsiej u la ong na ka liang ka seng ka la pyrshang ban leit ïakynduh ïa u Myntri Rangbah ka jylla, u Conrad K. Sangma hynrei haduh mynta um shym la ai jubab eiei satia halor kane.
U Bah Nongsiej u la ong ba ka Mawsynram C&RD Block ka dei ka Block kaba la rim tam hapoh ka jylla bad kaba la sah kum ka Block la kumba 62 snem.
“Ka Mawsynram C&RD Block ka dei ka Block kaba la slem bha hapoh ka Jylla jong ngi namar la pynlong ïa ka kum ka Block naduh u snem 1982 bad lada kheiñ haduh mynta ka la poi 62 snem”, la ong u Bah Nongsiej.
U la ong ka Mawsynram C&RD Block ka don ïa ka jingheh bad jingïar ym duna ïa ka 510 sq.km kaba don ym duna ïa ka 162 tylli ki shnong bad ka jingdon ki briew ka la poi sha ka 54 hajar tam, bad ha ki 13 snem ka la don ym duna ïa ka 70 hajar ki nongshong shnong.
U la ong ba ka jingjngai na Mawsynram sha Shillong ka long ym duna ïa ka 60 km bad haba kheiñ pat ïa ki shnong kiba don ha khappud ka la poi sha ka 90 km tam ka jingjngai.
“Dei halor kata ka nongrim ba na ka liang jong ngi ka seng bad lai tylli ki jylli, ngi lah rai syndon hadien ka jingshong pyrkhat ban kyrsiew thiah ïa ka sorkar kaba sngap mynti ban pynkynmaw ïa kane ka jingdawa jong ki paidbah ba ngin pynlong da ka jingïashong kyllaiñ mongor ha ka 10 tarik u bnai Nailar ha ka por 11 baje mynstep”, la ong u Bah Nongsiej.
Na ka liang u Bonsen Snaitang, President jong ka KSU Balat Area Circle, u la ong ba ha ka por ba ki seng saiñpyrthei ki pynkhreh ïa ka ilekshon MLA, ki la pyndonkam pynban ïa ka mat ban kyntiew Civil Sub Division ïa ka Mawsynram kum ka mat ïalap ilekshon jong ki.
