Shillong, Naitung 30
Ki pulit ka East Khasi Hills ki dang pynlong ka jingtohkit ban lap dien ïa ki runar kiba la donkti ban thang ïa ka kali (Gypsy) bad kumjuh ruh ka jingkawang petrol bom ïa kawei ka ïing ha thaiñ Jhalupara.
Lah ban pynkynmaw, mynshem taïew kawei ka ïing kaba don ha ka shnong Mawbah (Jhalupara) kaba la shong wai da ki bar jylla ka la shah kawang petrol bom ha ki runar ki bym lah ban tip ki dei kiei.
Kane ka ïing kaba la shah kawang petrol bom ka dei jong ka Kong Julie Lyngdoh bad la ong ba ka dei ka ïing kaba la shong bad sah wai da ki bar jylla. La ong ba ki runar ki la wan na ka bynta ba long khlaw kaba don shadien jong katei ka ïing bad ban kawang ïa u petrol bom, uba la leit ban dei shwa ha ka ‘Dish TV’ kaba la pyndait bad sa hap pat sha madan.
Ha kawei pat ka jingjia, la ong ha ka step jong ka Lah Sngi U Blei, kawei ka kali Gypsy jong ka Sorkar kaba don ïa u number ML01-5989, kaba dei jong ka tnat PWD ka la shah thang dusmon ha ki runar haduh ba ka la ingkhong khait.
Kane ka la jia hajan jong ka Ïing Dak ha Nongmensong, Umkdait.
Ha kaba ïadei bad kine ar tylli ki jingjia, na ka liang jong u Superintendent of Police (SP) ka East Khasi Hills u Bah Sylvester Nongtnger, u la ong ba ka jingtohkit na ka liang ki pulit ka dang ïaid shakhmat bad haduh mynta ym pat tip ne lap ksai ïa ki briew kiba donkti ha kine ki kam.
U SP u la pyntip ruh ba la dep ban bthah sha baroh ki OC bad IC ba kin pynthikna ba ïa ki kali dei ban pynïeng ha ki jaka kiba long shngaiñ bad khamtam lei ki kali sorkar ba kim dei ban pynïeng ha ki jaka kiba lah ban buh jingma.
U SP u la ïathuh ruh ba u la dep ban kyrpad ïa ka Deputy Commissioner jong ka District ba kan pynmih ka jingbthah sha baroh ki tnat Sorkar ba kin bthah ba ïa ki kali sorkar dei ban pynïeng ha ki jaka ba long shngaiñ khnang ba kan nym don kano-kano ka jingjia shah thang ne shah pynjulor.
Shuh shuh u la pyntip ruh ba na ka liang jong ki pulit ki ju pynlong ïa ka jingïaid pahara miet kaba man ka por bad kumjuh ruh ka jingtalasi kali na ka bynta ban pynthikna ba yn nym don kino-kino ki kam sniew ne ki kam ki ban pynthut ïa ka shongsuk-shongsaiñ.
